Verse 1راوی ایس کہانی والا لعلاں دا ونجارا چن چن موتی دئے مزوری کہے محمد یارا
Verse 2شہزادے نوں چھوڑ اتھائیں سنگ لدھا اس بھارا شاید دی لے خبر اکلا دور رہا بیچارا
Verse 3اوکھا سوکھا ہو اکواری ڈھونڈ لیاویں اس نوں تینوں بھی ربّ سنگ ملاوے سنگ ملاویں اس نوں
Verse 4سر پر سفر مصیبت سہیئے اپنا حالَ ونجائیےنجم-نسا سہیلی وانگر یاراں یار ملائیے
Verse 5حاتم تائی نے سن بھائی کیتی کیڈ کمائی منّ سوال دوئیے دے لئے اپنی جان گوائی
Verse 6بادشاہی سٹّ سفر مصیبت ستّ واری اس چائی ہن تکّ نام حیات اسے دا شابش دیس لوکائی
Verse 7توں بھی مرد جوان کہاویں کوڑا سچا جیسا شاید تے شہزادے والا میل کراویں کیسا
Verse 8اس نوں باہوں پکڑ شہر دے راہ پر آن بہائیں صیف-ملوک شکار چلے تاں اوسے راہ لنگھائیں
Verse 9ہک دوجے نوں ویکھ لینگے رہسی نہیں اکلا دونویں راضی ہون اس کموں پاک تیرا تد پلہ
Verse 10بنھ ہن لکّ محمد بخشا راوی مرد ونگارےہک دن صیف-ملوک شاہزادہ چڑھیا طرف شکارے
Verse 11سراندیپ شہر دا والی شہنشاہ وڈیرا اوہ بھی نال شہزادے چڑھیا لشکر ہور بتیرا
Verse 12سراندیپ نگر وچ پھردے کوچے گلی بازاراں ہر ہر کدمے نال شہزادے پھردے سرداراں
Verse 13مانک موتی ہیرے پنے مہراں ہور دیناراں صدقے سٹّ سٹّ تودے لگے پیراں ہیٹھ سواراں
Verse 14خلقت بھجّ بھجّ تکن آوے صیف-ملوک پیارا مصر شہر دا والی کیسا دیوتیاں تے بھارا
Verse 15میر وزیر عمرہ شہزادے شاہ سوداگر زادے پنچ پنچائت اہل ولایت صدقے دین زیادے
Verse 16شہزادے نوں ویکھن والے انت نہ رہا کائی ہک دوجے تے ڈھیہہ مردے عورت مرد لوکائی
Verse 17ہک چوبارے وچوں ویکھن جھاکی کھولھ شتابی گلیاں چھت بازار بنیرا خلقت بے حسابی
Verse 18سبھ کسے نوں مٹھا لگدا ہر ہک دے دل پڑدا خلقت تکّ تکّ رجے ناہیں کوئی نہ پچھے مڑدا
Verse 19ہک شاہزادہ دوجا سوہنا نالے سخی بہادر نالے دور وطن تھیں آیا سفر ڈٹھے اس نادر
Verse 20حسن جوانی مدھ مستانی چہرے عشقَ نورانی عمر اوایٔل ہندا گھائل جو دیکھے اس جانی
Verse 21دانشمند اکابر نالے عالم فاضل راگی خوش آواز کرے جس ویلے پیڑ پرم دی جاگی
Verse 22ہر بندے نوں لگا پیارا جس جس نے اوہ ڈٹھا جہڑے صفت زبانوں کردے ہووے اوہناں منہ مٹھا
Verse 23سننے والے سن سن صفتاں عاشق ہون بتیرےشاہزادہ وچ شمع نورانی خلق پتنگ چوپھیرے
Verse 24جے اوہ قدم اکھیں تے رکھے سبھ آکھن بسملاہر کوئی دے دوائیں دل تھیں کوئی نہ کردا گلہ
Verse 25خلقت آکھے جو کجھ خوبی دنیاں اتے آئی جو جو صفت صلاحون والی خالق پاک بنائی
Verse 26جو بھلیائیاں ودھ شماروں وچ کتاباں سنیاں سبھناں صفتاں وچ محمد ایہو سچ مچّ گنیاں
Verse 27جو کجھ زینت زیب بدن دا صورتَ حسن جوانی اسے کارن سرجی خالق دتیؤسُ کر ارزانی
Verse 28ویکھ حیران رہی سبھ خلقت تھاں-پ-تھاں کھلوئی صیف-ملوکے دی اسواری شہروں باہر ہوئی
Verse 29رکھ شکار بہانہ ٹریا ہون جنگل دا واسی شاید دے اس درد فراکوں ہویا جی اداسی
Verse 30پری ولوں کجھ ہوئی تسلی وقت ملن دا آیا چوداں روزاں دا کر عرصہ ملکہ ذمہ چایا
Verse 31شاید دی ہن چھک سینے وچ لین آرام نہ دیندی ترٹی سانگ کلیجے اندر ہردم رڑک مریندی
Verse 32شاہزادہ دل خفگی اندر چپّ چپاتا جاندا باہر شکاری دسے وچوں آپ شکار غماں دا
Verse 33شاید نوں ہر سائت اندر یاد کرے تے رووے آکھے یا ربّ سائیاں کتھوں ایڈ نصیبہ ہووے
Verse 34شاید یار ملے اج مینوں اچنچیت اس راہوں جاوے داغ جدائی والا ہووے فضل الاہوں
Verse 35اسے سیر شکارے اندر پھردا سی شاہزادہ کی تکدا ہک جائی بیٹھا مرد بڈھا ہک سادہ
Verse 36بیٹھا کول اوہدے ہور دوجا شخص جوان عمر دا تن رنجوری اپر بھوری نہ تہہ-بند قمر دا
Verse 37لمے وال مداری وانگر لٹاں بن بن آئے نہ سر پگّ نہ ٹوپی چولی منہ سر خاک رمائے
Verse 38پیر پاڑ بیائیاں کیتے میل کیتا رنگ کالا نقش سندر محبوباں والے مجزوباں دا چالا
Verse 39لاغر انگ ہویا سکّ تیلا رنگ کیسر جیوں پیلا اکھیں پانی ڈل ڈل ڈلکے برا غریبی حیلہ
Verse 40ہتھاں پیراں دے نہوں ودھ کے نشتر وانگر ہوئے بغلاں ہیٹھ حجامت والے لمے وال کھلوئی
Verse 41ہکو بھوری بگلا اپر اوہو لکّ دوآلےچپّ چپاتا بیٹھا ڈٹھا مجزوباں دے چالے
Verse 42نموجھون حیران فکر وچ سر زانوں تے دھریا آیا نظر شہزادے تائیں دھوڑ غماں دی بھریا
Verse 43جاں کر نظر ڈٹھا شہزادے پیا بھلاوا عقلوں شاید وانگ نمونہ دسے ہتھوں پیروں شکلوں
Verse 44کر تاکید ہزار ہزاراں کہندا شاہ نکیبےلے چل ڈیرے میرے اندر اس مجزوب غریبے
Verse 45چیتا چیتا قابو رکھیں متّ کدھرے اٹھ جائے جاں میں مڑکے ڈیرے آواں آن دسیں اس جائے
Verse 46لے کے حکم غلام شتابی پھریا جا چوپھیرےدھرِ اگے مجزوبے تائیں آن بہائیوسُ ڈیرے
Verse 47شہزادے نے تاول کیتی کویں مڑ کے چلاں اس غریب جنے تھیں پچھاں حالَ اوہدے دیاں گلاں
Verse 48چامل چایا چاء چلایا گھوڑے چابک لایا ہک اندر سی سک سجن دی چھک وراگ لیایا
Verse 49ڈیرے آن لتھا پھر جلدی فارغ ہوئِ شکاروں آون ساتھ غلاماں تائیں حکم ہویا سرکاروں
Verse 50حاضر کرو شتابی ایتھے اس مجزوب جنے نوں خفگی دی گلّ پچھیئے ساری خفتی رنگ بنے نوں
Verse 51خدمتگار گئے اٹھ جلدی پکڑ غریب لیاندا شہزادے دے تختے اگے جاں اوہ ہویا واندا
Verse 52کرے سلاماں وانگ غلاماں چمّ زمین ادب دی کہے دوائیں صفت سنائیں وانگ کلام عجب دی
Verse 53بہت فصاحت نال بلاغت کرے کلام زبانوں خوش اوازا سمجھ اندازہ بولے سخن بیانوں
Verse 54وانگ وزیراں کر تدبیراں خوب کرے تقریراں سن تفسیراں با تاسیراں لگی چپّ امیراں
Verse 55چال کمال وبال الودی نال زوال اویہےحالَ مثال کنگال سدائیاں کال مکال اجیہے
Verse 56عامَ تمام کلام اوہدے سن کام سلام شہانے نام انعام حرام ہوئیو نے ویکھ کلام یغانے
Verse 57شہزادے فرمایا اگوں سن توں مرد غریبا کتھوں آئؤں کتھے جاسیں پھیرے کدھر نصیبہ
Verse 58کی مطلب کی نانواں تیرا دسیں مرد بدیسی کہیوسُ مطلب پچھو ناہیں کون سائیں بن دیسی
Verse 59مصر شہر تھیں آئیوسُ شاہا اوہ میں وطن پیارا جاون دا کجھ پتہ نہ اگوں کتّ ولّ رزق ہمارا
Verse 60نام مصر دا سن شہزادے بھڑک لگی اگّ سینے آہ چلاوے تے فرماوے سکھ وسّ مصر زمینے
Verse 61پھر پچھے کی نانواں تیرا سچ دسالیں بھائی کہیوسُ نام میرا ہے شاید رکھیا بابل مائی
Verse 62شاید دا سن نام شاہزادہ تختوں اٹھ کھلویا ہو بے ہوش ڈھٹھا کھا گردی صحیح ہووے جیوں مویا
Verse 63جاں بے ہوش ہویا شاہزادہ ڈٹھا نفر غلاماں بے عقلاں کجھ سمجھ نہ کیتی پایا شور ہنگامہ
Verse 64جو جو آہے دانش والے شہزادے پر ڈھٹھے شاید نوں پھڑ مارن لگے ہو بے عقل اکٹھے
Verse 65کند فہماں نے مالم کیتا شہزادے دا ویری صیف-ملوک کیتا اس دکھیا ایہہ کیوں جاوے خیری
Verse 66ہک دوئیے تھیں سرس اوہ ظالم ترس نہ کردا کوئی اس آزز دے ونڈے یارو کی دساں جو ہوئی
Verse 67لتاں مکے مار طماچے نال تڑاتڑ وٹاں سوٹے سہِ سو لاساں پئیاں بھنیا پھٹاں سٹاں
Verse 68ماراں کھادھا ڈھہندا رڑھدا کر ہمت اٹھ نٹھا ہک اکلے کوٹھے اندر چھپ کتے ونجھ ڈھٹھا
Verse 69صیف-ملوک اتے چھنکائے عطر گلاب امیراں پکھے جھلے تلیاں ملیاں وانگو سکیاں ویراں
Verse 70جس ویلے شاہ ہوش سمبھالی پچھیوسُ شاید کتھے سبھ حقیقت نفراں دسی ایہہ کجھ گزری اتھے
Verse 71ماری دا اٹھ نٹھا شاید اسیں رہے وچ رولے خبر نہیں ونجھ چھپیا کتھے ہے بچیا کس ڈولے
Verse 72صیف-ملوک کیہا کم بختو برا ہنیر کیتو اے اپنے ولوں سجن بن کے میرا لہو پیتو اے
Verse 73احمق سجن دی بھلیائی ویر ہندا سترانا تن دے سجن دل دے دشمن جنہاں زہد نہ بھانا
Verse 74شہزادے فرمایا اس نوں پیدا کرو شتابی نفراں جاتا ہے تکسیری کریئے ڈھونڈ خرابی
Verse 75نفر غلام چوطرفی دوڑے آوے کتوں نظر وچ پیروں واہنا آپ شاہزادہ بھجدا پھرے شہر وچ
Verse 76کوچے گلی بازار محلے دیندا پھرے ڈھنڈورے اس صورتَ اس قد اس ویسے اس روسے اس ٹورے
Verse 77ایس گھرے وچ اساں کھڑایا دسو جس نے ڈٹھا یا کوئی ڈھونڈ لیاوے کدھروں کھولھ دیاں اس چٹھا
Verse 78ہک ہزار دینار دیاںگا جو اس نوں پھڑ آنے بہت عزیز اسانوں لگسی سجن دل دے بھانے
Verse 79سرگردان شاہزادہ پھردا منہ کوڑا دل پھکا ویکھ اوہنوں جگّ لوڑن چڑھیا کیا وڈا کیا نکا
Verse 80خاتر خوف شاہاں دا نالے طمع پیو نے زر دا جا-ب-جائی لوڑن خلقت پتہ کرن ہر در دا
Verse 81نہ کوئی کھوج نشانی لبھے نہ کوئی پتہ نہ دساں شاید چھپیا سنے ڈھنڈورے آکھے کتّ ولّ نساں
Verse 82جیوں جیوں لوڑ تلائش ویکھے بہندا ہو چپیتادل وچ گھڑے دلیلاں ربا برا کیہ میں کیتا
Verse 83کی میں خون ایہناں دا کیتا ایڈ گناہ کبیرا ڈھونڈ سزائیں دیون لگے ان دوسے بے-تقصیراں
Verse 84خبر نہیں جے قتل کرنگے یا پھڑ قید کریسنیا کوئی سخت تمبیہاں دے کے غصے نال مریسن
Verse 85شاید خوف اندیسے اندر جان سکے تن کمبے صیف-ملوک ڈھونڈیندا وتدا چایا درد المبے
Verse 86گھر گھر ہوکے دیندا پھردا بھجدا پیر نہ لگے خفگی نال ہویا رنگ پیلا ہوٹھ سکے منہ بگے
Verse 87لدھا یار کھڑایا مڑ کے پیا ہنیر خدایا جیون میرا ہے کس کاری جے اوہ ہتھ نہ آیا
Verse 88ادھر اوہ دوائیں منگے شالہ کوئی نہ ویکھے ادھر ایہہ کہے جھبّ لبھے میل ہووے کتّ لیکھے
Verse 89دو بندے اس کوٹھے آئے اوڑک لوڑ کریندے اندر وڑ کے ویکھ لیو نے جھنڈوں پکڑ مریندے
Verse 90شاید آزز دے دہائی نسدا یارو ناہیں بنھے ہتھ سوال پکارے اتنا مارو ناہیں
Verse 91والاں تھیں پھڑ دھروہ لیوُ نے ونجھ حضور پچایا جاندے جنے وانگ فراکے اپنا آپ وکھایا
Verse 92جھکھڑ پتّ اڈائے پیلے پھری ہوا چمن دی نسّ پیا اوہ چھڈّ وچھوڑا آئی وار ملن دی
Verse 93ہو بے ہوش ڈھٹھا ونجھ شاید کجھ خوفوں کجھ ماروں شاہزادہ پھڑ تلیاں ملدا آپ کریندا داروں
Verse 94عطر گلاب لگے چھنکاون ہور ملن خشبوئیاںہوش پھری اٹھ بیٹھا کہندا دسیں کیکر ہوئیاں
Verse 95حالَ حقیقت اپنی ساری کھولھ سنا جوانا کیوں کر مصر شہر تھیں ٹرکے پہتوں ایہناں مکاناں
Verse 96شاید دے دعا شہزادے شالہ سکھیا جیویں دولت تخت اکبالاں والا سدا زیادہ تھیویں
Verse 97سر پر ظل-الٰہی ہووے قدماں وچ ولایت دشمن چور ہوون تے سجن مانن خوشی نہایت
Verse 98شوکت شان عدالت عزت راج حکومت پایا روز قیامت توڑی شاہا دن دن ہووے سوایا
Verse 99عاصم بن صفوان شاہزادہ مصر شہر دا والی نوکر اس دے تختاں والے ہور شہزادے چالی
Verse 100صالح ابن حمید اوہدا سی ہک وزیر پیارا میں ہاں بیٹا اس دا شاہا کرماں دا ہتیارا
Verse 101میرا ہک شاہزادہ آہا بیٹا عاصم شاہ دا صیف-ملوک آہا اس ناواں بھائی سورج ماہ دا
Verse 102بھانا ربّ دا ایویں ہویا اٹھیا دانہ پانی کپڑے اتے لکھی ڈٹھیؤسُ مورت پری زنانی
Verse 103ویکھن سائت کٹھا اس مورت جیؤ گیا ہو راہی اٹھ پری دی لوڑے چڑھیا چھڈّ ولایت شاہی
Verse 104ستر ہزار عمرہ سلامی دولت رخت جواہر مال خزانے تے سمیانے لے حسابوں باہر
Verse 105ہو اسوار جہازاں اتے وچ سمندر ٹریا ہک دن واء مخالف جھلی مینہہ غضب دا ورھیا
Verse 106بھجّ جہاز ہوئے کئی ٹوٹے غرق ہویا سبھ ڈیرہ ہک دوئیے دی سار نہ کوئی آہا سخت ہنیرا
Verse 107میں اک تختے اتے رڑھیا پیش نہ چلی کائی قدرت پاک خدائی رکھیا شاہوں پئی جدائی
Verse 108شہزادے دے درد فراکوں بہتر سی ڈبّ مرنا ڈاہڈھے نال نہ زور محمد جو بھاوے اس کرنا
Verse 109چوداں برساں دے ہن نیڑے مدت ہوئی وچھنےسمبھ گیا سبھ آنسو پانی دیدے اتنے رنے
Verse 110سرگرداں رہیوسُ نت پھردا ہر ٹاپو ہر بندر نسٹاخاں دی کومے پہلاں پائیؤسُ قیدے اندر
Verse 111پنجرے اندر پا اوہناں نے کیتا مینوں قیدی نال درخت رکھن لٹکائیں نہ گلّ سمجھ کسے دی
Verse 112درداں نال ہویا پور سینہ خوب بلند آوازے غزلاں گاواں من پرچاواں شعر ؎ پڑھاں تر تازے
Verse 113نہ میں گلّ اوہناں دی سمجھاں نہ اوہ سمجھن میری مینوں جان پنکھیرو لاون اگے دانے ڈھیری
Verse 114کچے دانے پاون مینوں کھاون کارن چوگاں اوہ نہ کھاواں پیٹ سکاواں ربّ دی دتی بھوگاں
Verse 115پنجرہ میرے والا ہووے نال رکھے دیاں ڈالاں موری وچوں حیلہ کرکے باہر ہتھ نکالاں
Verse 116میوے کول ہوون جے پکے توڑ شتابی کھاواں تاں اوہناں پھر مالم کیتا ہے ایہہ مرغ سچاواں
Verse 117میوے پکے دیون لگے دانے بھنّ چراونفجرے شام نکالن باہر جنگل-بولل کراون
Verse 118پھر پنجرے وچ پاون جلدی کرن وساہ نہ ماشا مشکل قید مصیبت مینوں اوہناں عجب تماشہ
Verse 119بے ترساں نوں ترس نہ آوے کردے قید پرنداں سکھیئے باغیں اڈن والے پنجریاں وچ جنداں
Verse 120کرن جدائی ڈاراں نالوں جوڑے چا تروڑنپر بھجن سر گنجے ہوون اجے بے ترس نہ چھوڑن
Verse 121جنس اپنی تھیں وچھڑ جہڑے نہ جنساں وچ آئے کاہدا سکھ سواد اوہناں نوں دم دم دکھ سوائے
Verse 122وچ ہوائیں اڈن والے قید اندر درماندے نہ اوہ سنگ نہ چوگ خوشی دے زہر نوالے کھاندے
Verse 123پنجریاں وچ ٹرن نہ ہندا کیکر ہوئے اڈاریآئی باجھوں جان نہ نکلے جھلن سخت قہاری
Verse 124خبر نہیں کس دیسوں آون مرغ غریب بٹیرے دانہ پانی پکڑ بدیسیں ہر ہر بنے پھیرے
Verse 125اک لیہندے تے چڑھدے جاندے چڑھدے تے مڑ لیہندے ہکناں سخت نصیب اضل دے پنجریاں وچ بہندے
Verse 126جالاں والے پکڑ لیاون پان پنجر وچ جالاں چالاں یاد کرن تے روون کوئی نہ محرم حالاں
Verse 127جیوں جیوں روون کرن پکاراں بولن بول غمی دے اوہ روون تے رکھن والے ہسّ ہسّ دوہرے تھیندے
Verse 128نہ کوئی سمجھے گلّ اوہناں دی نہ درداں دیاں کوکاں پھڑ پھڑ کے ادھ-مویا ٹورن عجب تماشہ لوکاں
Verse 129ساری عمر پٹیندیاں گزرے سر تے وال نہ رہندے پتا مارن شکر گزارن ربّ دا دتا سہندے
Verse 130بے رحماں نوں رحم نہ آوے ویکھ مصیبت بھاری سجناں نالوں سجن وچھنے رسم کیہی ہتیاری
Verse 131ہک لیہندے دے چڑھدے جاندے چڑھدے دے مڑ لیہندے ہکناں سخت نصیب اول دے پنجریاں وچ بہندے
Verse 132دور وطن ہم راہ نہ کوئی پیا قضیہ بھارا کھولھیں قید امید تیرے تے یا مرشد سچیارا
Verse 133بری جدائی سہنی آئی لدّ گؤں دلداراربّ رحیم غفور محمد میلے پھیر پیارا
Verse 134مدت پچھے شاید تائیں نظر پیا شاہزادہ حالَ سنا محمد بخشا گلاں چھوڑ زیادہ
Verse 135یار اڈیک کسے دی اندر لے لے کھان ادھاراسدھی صاف مکا کہانی نہ کر بہت پسارا
Verse 136شاید حالَ سناندا شاہا ایویں ساں میں قیدی کدے خلاص کریگا ایتھوں آہی آس ربے دی
Verse 137آیا ربّ کریمی اتے ایہہ سببّ بنایا جو سلطان ملک دا آہا چڑھ اوہناں تے دھایا
Verse 138جس کومے وچ قیدی ہیساں میں پردیسی بندہ اس کومے دی سختی آئی مار چکائیوسُ دھندا
Verse 139اوتھوں ربّ خلاصی کیتی نسّ ٹریوسُ کر جلدی اگوں شطر-سراں نے پھڑیا لکھی ملی اضل دی
Verse 140شطر-سراں دا راجا جہڑا گھر اس دے سی بیٹی قوم اپنی وچ صورتَ والی زیور نال لپیٹی
Verse 141اس بیبی نے میرے تائیں اپنے کول منگایا قدرت نال اوہدا دل شاہا ویکھن ساتھ وکایا
Verse 142مدت پاس اپنے اس رکھیا لوڑے مطلب پایا اوتھوں بھی پھر نسّ کھلوتا مولٰی پاک بچایا
Verse 143گھنی گھنیری ویکھ مشقت پہتوسُ ایس نگر وچ ہک مسجد وچ ڈیرہ کیتا بیٹھا ساں فکر وچ
Verse 144ہک نمازی بڈھا آہا اس مسجد دا بانگاں اج اس باہر آندا مینوں سیر کرن دی تانگھاں
Verse 145اس جائی آ بیٹھا شاہا جس جائیؤں تدھ آندا صیف-ملوک دے غم اندر بیٹھا ساں درماندا
Verse 146شہزادے ایہہ گلاں سن کے شاید پکّ پچھاتاہنجھو رویا اٹھ کھلویا فضل ربانا جاتا
Verse 147شاید تائیں سینے لائیوسُ نال پیار صفائی کہندا صیف-ملوک شاہزادہ میں ہاں تیرا بھائی
Verse 148صیف-ملوک میرا ہے ناواں عاصم شاہ دا جایا تینوں مینوں وچ سمندر ربّ وچھوڑا پایا
Verse 149اپنا آپ شاہزادہ دسے شاید مول نہ منے خبر نہیں اوہ کتھے رڑھیا کس نے لایا بنے
Verse 150جیکر کدھرے رڑھ کھڑ لگا ہوسی حالَ شکستے ایہہ کوئی شاہ ولایت والا فوجاں ملن رستے
Verse 151دولتمند اکبالاں والا راج حکم اس بہتا کیکر اوہ پردیسی شوہدا ایس مراتب پہتا
Verse 152صورتَ جیسی صورتَ ہندی وانگ آواز آوازے عاقل دانے سوہنے سندر بھلے بھلیرے تازے
Verse 153صیف-ملوک نہیں توں بھائی شاید کرے نہ باور ہر ہر جا نشانی دسدا صیف-ملوک اکابر
Verse 154شاید نے فرمایا اوڑک ہک نشانی پکی تد یقین لیاواں شاہا جے اوہ جاوے تکی
Verse 155صیف-ملوکے دے وچ متھے آہا خال نورانی اوہو خال ہووے اس شاہد مالم ہووے نشانی
Verse 156شہزادے دستار اٹھائی متھا کیتا وانداشاید خال ڈٹھا جس ویلے ڈھٹھا ہو درماندا
Verse 157ہوش عقل شدھ بدھ نہ رہیوسُ مردے وانگ پیا سی صیف-ملوک ملیندا تلیاں تن تھیں تران گیا سی
Verse 158لے گلاب مریندا چھٹے سر منہ سینے تائیں عرض کریندا بار خدایا اس نوں پھیر بچائیں
Verse 159شاید نے وتّ ہوش سمبھالی آیا جیؤ ٹکانے شہزادے دے پیریں ڈھٹھا چمے قدم دھننانے
Verse 160کہندا شکر ہزار ہزاراں ڈٹھیوں پھر سکھلاکی کجھ شکر زبانوں آکھاں کرم کمایا اﷲ
Verse 161شاید تے شاہزادہ دونویں اٹھ ملے گل لگّ کے سنج گئی پوشاک اکھیں تھیں ہنجھو نالے وگ کے
Verse 162سراندیپ نگر دے شاہے نالے فوج رعیت اہلاں حرماں تابعداراں ہوئی خوشی جمیعت
Verse 163گیا گواتا یار شہزادے مولٰی پاک ملایا سدّ حجام حجامت کیتی جا حمام نہایا
Verse 164کیمتدار پوشاک منگائی عطر اپر چھنکایا شاید دے پھر بدن لوائی چڑھیا روپ سوایا
Verse 165نغمے ناچ ہوئے ہر کوئی سوہلے گاون آیا چڑھیا روپ سوایا لالا کیسریاں رنگ لایا
Verse 166ہر ہر وال کڈھے چمکارے جیوں سونے دیاں تاراں حسن بے انت بسنت پھلاں دی ویکھن لوک ہزاراں
Verse 167شہزادے پھر کھانے منگے خدمتگاراں آندے مدت پچھے ملے پیارے رل مل دونویں کھاندے
Verse 168کھانا کھا ارامی ہوئے پیندے لال پیالے کھیوے ہندے مڑ مڑ دھوندے داغ وچھوڑے والے
Verse 169شاید نوں لے نال شاہزادہ ٹریا طرف مہلاں کی کجھ آکھ سناواں یارو اس خوشی دیاں گلاں
Verse 170ہوئے اسوار نراں تے دونویں اگے دوڑے اردلچالی شاطر بھجدے جاندے نال لباس مکلل
Verse 171ہر شاطر ہتھ ہندی تیغاں قبضے جڑت سنہری مکی ڈھالیں کھلے گردے پھلّ سورج دوپیہری
Verse 172پوشو پوش کریندے جاندے خلقت ڈھیہہ ڈھیہہ پوندی واہ شاہزادہ تے واہ شاید چاروں طرفوں ہوندی
Verse 173شوکت شان گھنیرا کر کے کر-او-فر ہزاراں شاید دا رنگ روپ سہایا جیوں گل وقت بہاراں
Verse 174محلاں دے دروازے آندا کرکے ایہہ وڈیائیشاہ نگر دا اگوں ملیا نالے ہور لوکائی
Verse 175استقبال اوہدے نوں آئے شہزادے سرکردےلکھ خاتر لکھ عزت کیتی والی اس نگر دے
Verse 176صیف-ملوکے دی پھڑ انگل سجے پاسے ٹورے شاید دا ہتھ کھبے پکڑے ٹردے ایسے ٹورے
Verse 177جا سلطان تخت تے بیٹھا اوہ بھی کول بحالِ سجے پاس شاہزادہ بیٹھا کھبے شاید نالے
Verse 178دتا حکم کلالاں تائیں سرخ شراب لیاؤکنجر اتے کلونت مراسی خوب سراں کر گاؤ
Verse 179تان ترانے کرن شہانے نغمے ناچ یغانےسات سراں تے تین گراماں گاون گنیں دانے
Verse 180پردے رود سرود خوشی دے گان بجاون سازی پین شراب رباب سنیندے مجلس ہوئی تازی
Verse 181حوراں ہار بہار بنائی خدمتگار پری-شاں گل-رخسار ثمن-برن لالے سنبل وال پریشاں
Verse 182چیرے کلغی توڑے چمکن تلیدار دپٹے گھیریدار نرم پشوازاں گوہڑے رنگ الٹے
Verse 183مارن پھیرے گرد چوپھیرے روشن کرن ہنیرے سن آوازے تازے تازے ہندے رقص گھنیرے
Verse 184زاہد صوفی ویکھ نہ سکدے اس مجلس ولّ دوروں جو تکے سو جا نہ سکے تاب حسن دے نوروں
Verse 185جاں عیشاں وچ ہوئے سکھلے دور ہوئی دلگیریشاہ نگر دا پچھن لگا کر کے جیبھ مٹھیری
Verse 186شاید بیٹا دس اسانوں حالَ حقیقت ساری کس سببّ بچایوں مولٰی کیکر عمر گزاری
Verse 187شاید کہندا سن توں شاہا میری درد کہانی جاں شہزادے نالوں کھڑیا دور رڑھایا پانی
Verse 188چالی روز رہی سی جھلدی وا مخالف ظالم تختے تے میں رڑھدا رہا نہ دسدا کوئی عالم
Verse 189سرگردان رہا اوہ تختہ اتنی مدت توڑی چاروں طرف دسے جل مارو زمیں نہ لبھدی لوڑی
Verse 190آفت ٹھاٹھاں دین کلاوے گھمن-گھیر قہر دے دانہ پانی اجے وی آہا متھے لیکھ امر دے
Verse 191ہک دن جھکھڑ وا کھلوتی ہوئی دور غباریامبر دھرتی دسن لگے کیتی ربّ غفاری
Verse 192ہک ٹاپو دے دندے مینوں جا صاحب نے لایا جان لباں پر آئی آہی بھکھ پیاس رلایا
Verse 193ٹاپو اندر نظریں آئی نئمت ودھ شماروں مٹھے میوے ٹھنڈے پانی خوش ہوا بہاروں
Verse 194گھنیاں چھاواں سجیاں جائیں سبزے دھرتی کجی ہریاں شاخاں میوے بھریاں کوئی نہ سکی بھجی
Verse 195کوئی مدت اس بندر اندر کیتا وقت گزارا اوڑک ٹریوسُ بنا کے ٹلا لکڑیاں دا بھارا
Verse 196میوہ پانی ٹلے اتے پا لئی کجھ خرچی اوسر وقت بدیسیں بھکھے آپ حکیم بورچی
Verse 197پھیر اوہ ٹلا پانی اتے ٹریا چار مہینے اس سختی دیاں گلاں دساں سڑ بل اٹھن سینے
Verse 198ساری عمر رہاں جے گندا اوہ مصیبت بھاری سینکڑیاں تھیں ہک نہ مکدی ایسی رنج گزاری
Verse 199مچھّ کچھوے تے بلھناں تندوے سپّ سنسار جماتاںلدھر کمے تے جلہوڑے ہور ہزار آفاتاں
Verse 200مارو مار کریندے آون وڈے وانگ پہاڑاں ہر ہر دے منہ وچوں نکلن دوزخ ہار ہواڑاں
Verse 201اوہناں بلائیں تھیں ربّ مینوں قدرت نال بچایا ہر آزز دا حافظ ناصر واہ واہ بار خدایا
Verse 202ترے مہینے سبزی باجھوں کھادھی چیز نہ کائی سخت مصیبت اس کٹائی آہی جس بنائی
Verse 203ہک دن کرنا ربّ دا ہویا موج چڑھی دریاواں روئے زمیں تے پانی پھریا کی کجھ آکھ سناواں
Verse 204اچی نیویں تھاں نہ چھڈی جلتھل ہویا پانی میں پر روز حشر دا آیا مشکل سخت وہانی
Verse 205اس پانی دے زوروں میں بھی جیون تھیں ہتھ دھوئی ایہہ مویا کہ مویا میں بھی یار جویں سن موئے
Verse 206قہر تکے تے جھلے دھکے غوطے کھادھے بہتے لیکن لکھے دم عمر دے اوڑک مول نہ پہتے
Verse 207ندی اچھلّ اجیہا لایا ٹلا ٹاپو چڑھیا مولٰی صحیح سلامت مینوں خشکی اندر کھڑیا
Verse 208ٹاپو ویکھ ہویا دل راضی وانگ جنت دے کوچے سرو چنار انار کھجوراں ہور سفید الوچے
Verse 209فندک اتے اناب انجیراں داخ انگوراں گچھے جو من بھاوے سوئیؤ کھائیے نہ کوئی ٹھاکے پچھے
Verse 210ہندی میوے ہور ہزاراں گنتر وچ نہ آون پکّ پکّ سبھ ہوئے رنگ رتے رس چوندے من بھاون
Verse 211ہور عجب ہک میوہ ڈٹھا اس ٹاپو وچ بھائی وانگ انگورے گچھا اس دا صورتَ شکل صفائی
Verse 212شام پوے دن ڈبے جس دم جگّ پر پھرے سیاہی پتر چا لپیٹن گچھا قدرت نال الٰہی
Verse 213ساری رات رہے اوہ بدھا فجر ہووے پھر کھلدا نیک انیک آواز اس رکھوں نکلے بھارے تلدا
Verse 214ہور درخت ہک میوہ اس دا وانگر شکل منکھاں دسدا آدم جیوں لٹکایا زلف بدھی سنگ رکھاں
Verse 215ہر ڈالی پر ایہو جیہے میوے بہت رنگیلے بیٹھے کھائیے من پر چائیے بن ہاڑے بن حیلے
Verse 216میں بھی دل وچ نیت کیتی اتھے رہن بھلیرامیوے کھاساں وقت لنگھاساں سنگ نہ لبھدا میرا
Verse 217ہک دن اچنچیتی آیا نسّ-ناساں دا ٹولا مینوں پکڑ لیا رل سبھناں پا گھیرا کر رولا
Verse 218چکڑی اد لکڑ دا اوہناں پنجرہ خوب بنایا اس پنجرے وچ گھتّ کے مینوں نال رکھے لٹکایا
Verse 219سارے میں ولّ بٹ بٹ تکدے اوہناں شناس نہ کائی آدم شکل پچھانن ناہیں اوہ نسناس لوکائی
Verse 220ایہہ معلوم ہووے جو ایہناں آدم کوئی نہ ڈٹھا انّ کباب نہ دندے کھانا نہ کوئی میوہ مٹھا
Verse 221نیلا گھاہ گھتن میں اگے یا پھر سکے دانے کھوڑ بادام چھوہارے مچھی کھان آپوں ایہہ کھانے
Verse 222دانے گھاہ نہ کھادھے جاون بھکھ کیتی لاچاریپنجرے وچوں باہر آئیوسُ کر کے بہت ہشیاری
Verse 223خرش اوہناں دی کھاون لگوسُ مچھی میوے پکے ویکھ حیران ہوئے متاجبّ حصے جے کوئی تکے
Verse 224مینوں عجب پنکھیرو جانن کرن آپس وچ گلاں ایسا پنکھی کدی نہ ڈٹھا وچ اجاڑاں جھلاں
Verse 225ساری خرش اساڈی کھاندا دانہ گھاہ نہ کھاوےخبر نہیں کی ذات ایہناں دی کہڑے دیسوں آوے
Verse 226پھر مچھی تے میوے مینوں دین خوراک نروئیکھاون پیون سبھ کجھ آہا سکھ نہ آہا کوئی
Verse 227تنگ پیا دل میرا اوتھے چارہ کوئی نہ چلدا ویکھ کلہنی شکل اوہناں دی جگر سینے وچ گلدا
Verse 228صیف-ملوک پچھیندا بھائی شکل اوہناں دی کیسی کجھ نمونہ دس اسانوں کہڑی چیزے جیسی
Verse 229شاید کہندا سن شاہزادہ دساں کجھ نشانی سر اوہناں دا خکاں وانگر باندر وانگ پیشانی
Verse 230اکھیں سبز ڈراون دوروں دند مثال پلنگاں گور-خراں دی دیہی ساری دسدا بھی میں سنگاں
Verse 231صورتَ آدمیاں دی آہے دونویں ہتھ اوہناں دے اوٹھاں وانگر پھیر بدن تے بہتے وال رکھاندے
Verse 232صیف-ملوک پچھیندا اگوں نال محبت خاصی دس بھائی اس قیدے وچوں کیکر ہوئی خلاصی
Verse 233شاید کہندا سن شاہزادہ جو گلّ اگوں آئی ہک دن مینوں مارن لگے اوہ نسناس لوکائی
Verse 234پر کوئی روز ہیاتی باقی دنیاں اتے آہی مارن تھیں اوہ ہوئے پشیماں کیتا کرم الٰہی
Verse 235تحفہ کر کے بھیجن لگے دجے ملک کسے نوں ہک جنا پھر چا کندھاڑے لے ٹریا سی مینوں
Verse 236جاندے جاندے نوں ہک جائی پانی اگوں آیا وہندی ندی ڈونگھیری اندر پیر جدوں اس پایا
Verse 237پانی کولوں ڈر کے ہٹیا ٹھلھ نہ سکیا مولے میں جاتا ہن ویلا ایہو نسّ پواں ات رولے
Verse 238پنجرے تھیں میں باہر آیا چھال ندی وچ ماری دو تنّ باہاں مار شتابی دور گیوسُ کر تاری
Verse 239اگے رڑھدا جاندا آہا پانی تے ہک تختہ ہو اسوار پیا اس اتے پھڑیا ہچھا سختا
Verse 240پنج دہاڑے تے پنج راتیں گئیوسُ ندی وچ رڑھداپھیر کنارے لگا اگوں ویکھ سببّ کی جڑدا
Verse 241زنگی آدم کھاون والے اگے سان بتیرےمینوں پکڑ لیا پھر اوہناں کھان لگے کر بیرے
Verse 242پھر کوئی پئی دلیل اوہناں نوں کرن آپس وچ گلاں مینوں سمجھ نہ آوے کوئی نہ بولاں نہ ہلاں
Verse 243خوب شکار سمجھ کے اوہناں اپنے ملک پچایا تیلے والے مٹکے اندر گردن تیک ڈبایا
Verse 244جاں گوشت وچ تیل سنجرسی تر ہوسی سبھ دیہی تدوں خوراک کراںگے اس دی غرض اوہناں سی ایہی
Verse 245ترے مہینے نت بیناغا دوئیے وقت رجاندے شکر مغز بادام چھوہارے مچھی بھنّ کھلاندے
Verse 246دل وچ خواہش ایہہ اوہناں دی جاں ہوسی تن فربا میوے روغن تری دیونگے گوشت ہوسی چربا
Verse 247ہک دن مار کباب کراںگے ہوسی عید دلے دی ایس طمع تے پالن مینوں کر تاکید دلے دی
Verse 248جاں پھر گوشت موٹا ہویا پھری دیہی تے لالی آیا رنگ اجائب جسے صفت خداوند والی
Verse 249شیشے واگ چمکدی دیہی چوہ چوہ رتّ کریندی مثل انار بھکھے تن سارا لاٹاں جوت مریندی
Verse 250زنگی کھاون اتے ہوئے مارن لگے مینوں پر جے رکھن والا رکھے مارن طاقت کینوں
Verse 251دانے رل کے کرن صلاحاں ایہہ ہے تحفہ بھارا ہک دن کھادھا تاں کی ہوسی سال نہ لنگھسی سارا
Verse 252اپنے بادشاہے ولّ گھلیئے تحفہ کر نذرانہ نالے حاکم راضی ہوسی دیسی دان شہانہ
Verse 253کشتی اتے چاڑھ لیو نے لے چلے ولّ شاہے پانی وچ رہی اوہ بیڑی روز قدر ہک ماہے
Verse 254ہک دن واء پرے دی جھلی جھکھڑ سخت ہنیری کانگ چڑھی دریاوے اتے وانگ طوفان وڈیری
Verse 255چالی روز چلی پھر کشتی واہو داہ شتابی اوتھے میں بھی تکے بہتے رنج مصیبت آبی
Verse 256ہک دن ظالم واء کھلوتی نرم ہوا سکھائی خشکی دندے کول اوہناں دی بیڑی نیڑے آئی
Verse 257اگوں شہر آیا ہک نیڑے آدمیاں دا واسا مسلمان دسن سبھ بندے کفر نہ دسدا ماسہ
Verse 258زنگی دیکھ نساون لگے کشتی پرط پچھاہاںشہری لوک اکٹھے ہو کے پکڑ لیو نیں لاہاں
Verse 259زنگی ظالم لوک خنامی پکڑے مسلماناں سارے مار ندی وچ سٹے پئی وبا حیواناں
Verse 260مینوں اوہناں خلاص کرایا مار گوائے ویری نام امان ہک شہر اگے سی اس وچ پہتوسُ خیری
Verse 261قدرت ویکھ خداوند سندی آپے قدرت والا بازاں دے ہتھ دے کبوتر کردا پھیر سمبھالا
Verse 262باز بہے لے تتر پنجے جاں ربّ پاک بچائے لونہدی پئی مریندی بازے تتر پھر اڈ جائے
Verse 263بلی ککڑ بچہ پھڑیا کر شکار تری سی لگیوسُ سوٹا بچیا بچہ موئی موت بری سی
Verse 264کالے سپّ پھڑی سی چڑیا ساری منہ وچ پائی لگی سٹّ ہوئیاں سپّ گھائل ثابت باہر آئی
Point at or tap a word to see its meaning. With a keyboard, Tab reaches the words and the arrow keys move between them.