Verse 1چائ پلہ شہزادے ڈٹھا صورتَ نظریں آئی درِ-یتیمِ ان بدھا موتی لالوں جوت سوائی
Verse 2مست بے ہوش ستی ہک لڑکی صورتَ دی شہزادی حسن کمال جمال اوہدے دی حدوں گلّ زیادی
Verse 3سورج وانگ نورانی متھا نظر نہ کیتی جاوے جے پتھر دل والا تکے اکھیں پانی آوے
Verse 4قوس-کزہ ابرو دوویں جیوں عیدے چن چڑھدا صبر صوفی دا روزیداراں تکّ روزہ بھنّ کھڑدا
Verse 5یا دو تاک بہشتی آہے کستوری رنگ پھبدے یا خمدار کمان ابنوسی یا دو نون عرب دے
Verse 6ہر ہر پھمن والے جیہا سوہنا سر-ہکانیویکھن سائت کلیجہ سلے جیوں ترکش دی کانی
Verse 7زلفاں ناگ چنن سنگ لٹکے ولّ ولّ کنڈل مارے یا زنجیر ولاں دے آہے یا کمند ہتیارے
Verse 8اکھیں تیز کٹار فولادی آہیاں وچ میاناں سرخ میان بناتی ملیا سیون وچ شہانہ
Verse 9نکّ انگشت نبی اﷲ دی تیز چھری تلواروں اسماناں ولّ کرے اشارت مئززیاں دے پاروں
Verse 10چن دو کھنّ دوویں رخسارے بندیاں نال سنگارے بند بندے پھبدے آہے وانگ زہلّ ستارے
Verse 11سوہے ہوٹھ یاکوتوں گھڑ کے کاریگر سنوارے دند لباں وچ کجے آہے وچ شفق جیوں تارے
Verse 12ٹھوڈی سیؤ باغ بہشتوں سوہا رنگ انابوںگاٹا وانگ صراحی کچّ دی جیوں کر بھری شرابوں
Verse 13سینہ تختی صاف چنن دی خوب کاریگر جڑ کے اس اتے پستان لگائے چاندی دے پھلّ گھڑ کے
Verse 14مٹھی وات ایویں سی جویں سرخ اناراں کلیاں گھڑتل ڈبل روپئے والی صاف ہتھاں دیاں تلیاں
Verse 15گل پئی سی لوح روپے دی انگلیاں سن قلماں شنگرف منہ بھرے نہوں سوہے لکھ عشقَ دا کلمہ
Verse 16پتلا لکّ مٹھی وچ آوے اﷲ مکھن دیہی گندے پانی تھیں ربّ سرجی صورتَ پاک اجیہی
Verse 17روپ انوپ کڑی دا آہا وانگ بہار چمن دی نویں جوانی حسن ارزانی نازک شاخ سمن دی
Verse 18قد سفیدا سرو رنگیلا یا شمشاد گلستاں وقت بہار شگوفے وانگو منہ کڈھے سن پستاں
Verse 19سمبل وال زنجیری بدھی چہرہ پھلّ گلابی نرگس مست امبے دی پھاڑی اکھیں مرگ شرابی
Verse 20لالی ویکھ پیشانی والی داغ لگے گل لالے دند چٹے سن چمبے کلیاں موتی کھرے اجالے
Verse 21ٹھوڈی وانگ خوبانی بھی اوہ رس بھری سی پتلا اچا قد رنگیلا نازک شاخ ہری سی
Verse 22جادوگر دو نین کڑی دے وچ کجلے دی دھاری صوفی دیکھ ہوون مستانے چھڈن شب-بے داری
Verse 23جیوں چاندی دی مچھلی ہندی تویں نکّ اچیراچہرے سورج چشمے اندر ہردم رکھے ڈیرہ
Verse 24کالی رات ہووے رشنائی جے اوہ جلوا ڈالے اکھ کالی زلمات خضر دی آب حیات پیالے
Verse 25زلفاں دی خشبوئی ہلے تازہ کرن دماغاں آدم ویکھ مرن جیوں مردے ویکھ پتنگ چراغاں
Verse 26حسن اوہدے دی پھلاں کھاری باغ-ارم وچ وکدی حور پری جو صورتَ سوہنی ہر کوئی اسنوں سکدی
Verse 27باہاں سچی چاندی لوہڑے استا کار بنائیاں یا چٹیاں دو باسلیناں سن دولت نال بھرائیاں
Verse 28گل-داؤدی مکھڑا سوہنا سرخ شراب انگوری یا اوہ آب حباب حسابوں آہا این کافوری
Verse 29جے باغاں وچ واؤ فجر دی لوڑ کرے سے برساں ایسا سندر پھلّ نہ لبھے میں کی صفتاں کرساں
Verse 30پیشانی کافور دنداں ولّ ویکھ بھواں شرماوےغبغب صاف سیب دی پھاڑی ٹھوڈی ہیٹھ سہاوے
Verse 31چاندی وانگر رنگ جسے دا ہوٹھ مٹھے کھنڈ مصری مصری سوہنی اس ولّ تکّ کے ہسن مصر دا وسری
Verse 32پریؤں سوہنی تے منموہنی جوبن دے رنگ رتی شکل نہایت عقل بغائت جادوگر اکھ تتی
Verse 33دل آمیزی عشقَ انگیزی آن ادا بھری سی نازک انگ تے رنگ گلابی سینہ سنگ پری سی
Verse 34شیریں شکر شکل شمائل لیلیٰ ہیر ملاہتعذرا بدر-منیر زلیخا ویکھ ہووے دل راحتَ
Verse 35تازہ روپ اوازا مٹھا نقش نہار رسیلے صیف-ملوک بدیع-جمالے میلی بن وسیلے
Verse 36تیز زبان یونانی شاعر صفت اوہدی دے وارے گنگے ہندے بول نہ سکدے خوبی بے شمارے
Verse 37چست طبیعت ہندوستانی فردوسی دے ثانی ناز کرشما ساز جوانی لکھن نہ آسانی
Verse 38مانیں تے ارزنگ سیانے قصباں دی تدبیروں اس صورتَ دے نقش نگاروں عاری سن تصویروں
Verse 39ایسی سندر صورتَ لڑکی حور بہشتی نالوں تخت اتے بے ہوش ستی سی خالی سرت سمبھالوں
Verse 40صیف-ملوکے نیڑے جا کے نال کنے منہ لاکے بہت بلند اوازا کیتا کسے طرحاں ایہہ جاگے
Verse 41گمبد وچ آواز اوہدی پیا گھنگھارا رولے اس لڑکی نوں خبر نہ ہوئی نہ کجھ ہلے بولے
Verse 42ایسے ڈولے صیف-ملوکے مارے ستر نالے نہ اکھ پٹی نہ اوہ ہلی نہ کجھ سرت سمبھالے
Verse 43صیف-ملوکے عقل دوڑایا ایڈی نیند نہ کسے نہ ایہہ زندی نہ ایہہ موئی جادو ماری دسے
Verse 44سوہنی صورتَ ویکھ کسے نوں لگا عشقَ کڑی دا اس شہدی غم دھایا ہوسی قسمت سخت جڑی دا
Verse 45اس عاشق دے کہے نہ لگی تاں اس جادو پائے ایہو سر عقل وچ آوے اس نوں کون جگائے
Verse 46شاہزادہ اٹھ لوڑن لگا تختے دے چوگردےسجے کھبے لوڑ پواندی ہیٹھ تکے پھر سر دے
Verse 47سر ہیٹھوں ہک تختی لدھی چاندی دی جیوں برفاں اس اتے کجھ لکھیا ہویا سبز سیاہی حرفاں
Verse 48جو کجھ اس تے لکھیا آہا بولی سی سریانی خوش خط سی ہرفائت ساری لکھی قلم یونانی
Verse 49شاہزادہ ہر علموں واقف تاک آہا ہر وسبوںمنتر جادو سحر کڈھن دے تکڑا سی اس قصبوں
Verse 50تختی کڈھ لئی سر ہیٹھوں باہر گھروں لیایا دور ٹکا پھر آپوں مڑکے کول کڑی دے آیا
Verse 51جادو سحر ہٹاون والی پڑھی کلام زبانوں اس لڑکی دے سر تے پھوکے کرم ہویا سبہانوں
Verse 52جلدی ماری نچھّ کڑی نے پڑھیا شکر خدائی تخت اتے اٹھ بیٹھی اوویں ہوش ٹکانے آئی
Verse 53شہزادے اوہ تختی اوتھوں رکھی چا پریرے آپوں پھیر کڑی ولّ آیا مڑکے دوجے پھیرے
Verse 54پھیر گیا تاں تختے اتے بیٹھی وانگ امیراں ویکھ شہزادا ہویا سلامی نال ادب تدبیراں
Verse 55آکھ سلام لگا پھر آکھن طالع میرے جاگے سائت نیک بھلے دن آئے نہس ستارے بھاگے
Verse 56تدھ جیسی محبوب شکل نوں ڈٹھا میں غریبے پھیر سلام تیرے ولّ کیتا کھلے اج نصیبے
Verse 57چماں قدم مبارک تیرے سر صدقے کر سٹاں نفر بناں ان-ملا تیرا لاہ گھنیرا کھٹاں
Verse 58جاں شہزادے ایہہ گلّ آکھی لڑکی اس نوں ڈٹھا دے جواب سلام اوہدے دا بول زبانوں مٹھا
Verse 59صورتَ ویکھ ہوئی متہیر کہندی بار خدایا ایہہ جوان جہانوں سوہنا کہڑے دیسوں آیا
Verse 60جھنڈ کہی کستوری بھنی کالی کنڈلاں والی نورانی پیشانی کھلی ابرو شکل حلالی
Verse 61اکھیں اندر حسن-خماری یا ایہہ نیندر بھریاں جے ایہہ نظر پھرا کے تکے جھال نہ جھلن پریاں
Verse 62شیراں جیڈ زوراور دسے نازک پھل گلابوں نیکو-کارو فرشتہ صورتَ وافر حسن حسابوں
Verse 63بجلی دے چمکارے وانگوں اس دی اکھ چمکدی علف اضل دے نوروں لکھیا صفت کراں کی نکّ دی
Verse 64چہرے اتے رنگ اجائب جیوں کھڑیا گل لالا پر اندر وچ ہوسی کوئی داغ محبت والا
Verse 65بدر منیر اکاس حسن دا بے نظیر شاہزادہ تکّ کے اٹھ کھلوتی لڑکی کرکے ادب زیادہ
Verse 66جان پچھان نہ اٹھی تختوں ہویا جیؤ بے-وساستی جاگی ملی وراگی جیوں پانی نوں تسا
Verse 67بھیناں بھائیاں وانگر دوہاں ہک دوجے گل لایا اوہ ویرا اوہ بھینوں کہندا غیر خیال نہ آیا
Verse 68دوئے دکھاں والے آہے اگّ غماں دی ساڑے ہک کوکاں ہک ڈھائیں مارے ہک دوئے تھیں چاڑے
Verse 69آکھن ربا اسیں نمانے کس شامت نوں جمے نازاں دے پروردے آہے پئے قضیے لمے
Verse 70ربّ سبھایا کٹھا کر کے دکھ اسانوں جگّ دا مدت گزری سک سکیندیاں آدم منہ نہ لگدا
Verse 71آہیں ڈھاہیں رجن ناہیں باہیں دین کلاوے رتوں نیر دوہاں مکھ دھوتے رو رو ہوئے پھاوے
Verse 72لڑکی آکھے گھول گھمائی جس رستے توں آئؤںمیں تتی دے طالع جاگے مولٰی ویر ملائیوں
Verse 73کتھوں میں اس دولت جوگی خبر نہیں کی ہوسی ایس خوشی دے بدلے سانوں کیڈی اوکڑ پوسی
Verse 74شاہزادہ کر ہائے ہائے رنا گھتّ کہائیں کہندا ہک ہک وال تیرے توں میں قربانی جائیں
Verse 75کوہ قافاں وچ مدت گزری جنگل باریں بھالے کئی سمندر ٹاپو گاہے ڈٹھے شہر اجالے
Verse 76باغ بہاراں پھل ہزاراں باس لئی ہر پاسے کتوں نہ آئی بو سجن دی عمر گزاری آسے
Verse 77صورتَ تیری وچوں آئی مینوں بو سجن دی تیر جیہی تاثیر کلیجے تیرے راست-سخن دی
Verse 78جھلے جند نمانی میری قہر نزول ہزاراں بھلّ گئے سبھ تینوں ملیاں دم دم شکر گزاراں
Verse 79دتا درد ابال دوہاں نوں پکڑے سنگھ سگھنٹاںہڈکورے دم ترن نہ دندے یاد پئیاں سبھ سٹاں
Verse 80آپو اپنے دکھاں روون کس کسے دے روندے ربا اسیں بیچارے کدھرے سنگ اپنے وچ ہوندے
Verse 81صیف-ملوک اس کارن رووے شاہزادی کوئی ہوسی محلاں دے وچ ہسدی رسدی قید ہوئی بے دوسی
Verse 82ایسی سندر صورتَ لڑکی جادو مار سوالی اس بن ماپے بھیناں بھائیاں ہوگ پیا گھر خالی
Verse 83جس شاخوں ایہہ پھلّ ترٹا شاخ ہوسی اوہ سکی جس باغوں ایہہ سرو پٹایا رونق اس دی مکی
Verse 84جس لڑیوں ایہہ موتی کریا ہوگ لڑی اوہ ترٹی رنگ بے رنگ ہووےگا پیلا جس زر جوڑی چھٹی
Verse 85ہن اس بندوں کیوں کر چھٹے پھیر ملے سنگ سنگاں پوئے دوئے پنجے چھکے قید کیتے بد رنگاں
Verse 86کون لئے ہن ساراں اتھے پیش نہیں ہتھیاراں ایڈے شاہ کوئی راہ نہ لبھدا ، دور سنیندیاں باراں
Verse 87سخت مہم غنیم سرے تے ہک یتیم ہکلی ربّ رحیم کریم چھڈائے قید قدیم اولی
Verse 88کر اندیشہ روئی لڑکی صیف-ملوکے تائیں ایہہ جوان رنگیلا ربا آندوئی وچ بلائیں
Verse 89اوڑک دیو کریگا پھیرا ہک دن پاسے میرے اس نوں نسن مول نہ دیسی اچا کوٹ چوپھیرے
Verse 90کول میرے جد بیٹھا تکسی اس شہزادے تائیں عیب صواب نہ تکسی کوئی کرسی مار ازائیں
Verse 91دیوَ آدم دے دشمن مڈھوں ناہیں تکّ سکھاندے جے چھپے تاں مشکے لگّ کے ہر حیلے پھڑ کھاندے
Verse 92جس دن مہتر آدم اگے ربّ سجود کرایا سبھناں ملکاں سجدہ کیتا دیو نہ سیس نوایا
Verse 93خاوند دا فرمان نہ منیوسُ آدم دلوں نہ بھایا لعنت دا شیطان کہا کے طوق گلے وچ پایا
Verse 94آدم ونجھ بہشتیں بیٹھا خوب مقام سکھایا دیوے دا کوئی داء نہ لگدا لوڑے ویر مکایا
Verse 95جنت وچ نہ وڑنا پاوے ہو مردود سدھایا نال اوہدے کجھ پیش نہ جاندی اس نوں ربّ وڈیائیا
Verse 96جس ویلے وسّ لگا آہا اوڑک ویر کمایا جنت تھیں کڈھوایا آدم رو رو حالَ گوایا
Verse 97آدم نال ایہناں دا رہا مچیا ویر قدیمی ایہہ جوان بچے تد ربا جے توں کریں کریمی
Verse 98کی جاناں ایہہ ایسا سوہنا کن سہاگن جایا ایس قلعے وچ آن پچایا کس شامت نے چایا
Verse 99ایسا چودھویں دا چن سارا جھڑیا جس آسمانوں پیا ہنیرا ڈبا ہوسی چانن اوس جہانوں
Verse 100جس تاجوں ایہہ جھڑیا ہوسی سندر لئل چمکدا تاج والا سر اپنا ہوسی اندر خاک پٹکدا
Verse 101جس تاجوں ایہہ لئل چمکدا جھڑیا اندر گھٹے شاہاں دے سر رہا نہ ہوسی طالع اس دے گھٹے
Verse 102شاہزادہ تے لڑکی دونویں زاری کر کر ہٹے خالی مغز ہویا نہ قوت اکھیں نیر نکھٹے
Verse 103تخت اتے ہو بیٹھے دونویں کرن لگے پھر باتاں لڑکی تھیں شاہزادہ پچھدا پتے نشانی ذاتاں
Verse 104صیف-ملوک کہے اے لڑکی کون کوئی توں بندی کی نانواں کی ذات تساڈی کہڑے شہر وطن دی
Verse 105آدم ہیں یا ہور فرشتہ یا کوئی پری پیاری آدمیاں وچ حسن اجیہا ڈٹھا نہ ہک واری
Verse 106نام خدا دے سچ دسالیں کوڑ نہ بولیں اتھے ایسا جوبن نازک دیہی آدمیاں وچ کتھے
Verse 107لڑکی کیہا سچ سناواں ڈاہڈھی قسم خدا دی آدمیاں دی زاتے وچوں میں ہاں آدم-زادی
Verse 108پر توں بھی سچ دسیں مینوں بھائی نیک سرشتا صورتَ تیری دا کوئی ہوسی جنت وچ فرشتہ
Verse 109صورتَ مند جوان زمیں تے تدھ جیہا کس ڈٹھا جادوگر دو نین سپاہی بول مونہیں دا مٹھا
Verse 110جس جس پاسے ٹردا جائیں ٹھگیں رخت دلاں دے جت ولّ ویکھیں تیر اکھیں دے چیر کلیجہ جاندے
Verse 111تیرے قد برابر سوہنا باغیں سرو نہ کائی جسدے پیٹوں پیدا ہوئیوں دھنّ تیری اوہ مائی
Verse 112آدم ہیں یا حور بہشتی کہڑی ذات تساڈی مینوں بھی کجھ ہووے تسلی پچھاں بات تساڈی
Verse 113صیف-ملوک شہزادے کیہا خطرہ رکھ نہ ذرہ آدمیاں دی زاتے وچوں میں بھی ہاں مقررا
Verse 114لڑکی کیہا آدم ہو کے کیوں کر پہتوں اتھے آدم ذات نہیں پجّ سکدے ملک اوہناں دا کتھے
Verse 115پریاں دا ایہہ ملک ٹکانا دیوتیاں دے تھانے آدم سوئی پجے جس نوں دیو کوئی چا آنے
Verse 116آدمیاں وچ میں ہی تتی ڈٹھے پربت کالے ایہہ ولایت ہور کسے نوں نہ ربّ پاک دسالے
Verse 117صیف-ملوک کیہا گلّ میری لمی بہت کہانی دس برس میں پھردے ہوئے مشکل سخت وہانی
Verse 118ظالم عشقَ پری دے والی پیڑ کلیجے جاگی سکھ سلامت گھر دے چھڈے سفر ملامت جھاگی
Verse 119جنگل تے کوہ قاف سمندر کتنے ٹاپو بیلے بھکھاں تساں دھپاں پالے جھلے تاں اس ویلے
Verse 120عجب اجائب جائ ٹکانے ڈٹھے بے تہاشےآدمیاں جو سنے نہ کنیں ویکھے سیاں تماشے
Verse 121بحراں باراں شہراں اندر جو میں نظریں آئے وچ حساب نہ آون توڑے گندیاں عمر وہائی
Verse 122بھلیؤں بھلیاں چیزاں تکیاں انت نہیں کجھ رہا پر کوئی چیز تماشہ ناہیں ڈٹھا تیرے جیہا
Verse 123تیرا سر اجائب ڈٹھا پتہ نہیں کجھ لگدا ایسی بار غبار جنگل وچ سہج شنگار اے جگّ دا
Verse 124غول اجاڑی وسدے اتھے یا کوئی راشک ظالم ہور نہیں کوئی جون وسندی ملکوں باہرا عالم
Verse 125تینوں کس نے چا لیاندا دوجا کول نہ کوئی مائی باپ کتھے ہن تیرے کتھے جمی ہوئی
Verse 126کس دے پیٹوں پیدا ہوئیؤں کس نے جمی پالی صورتَ سیرت دی توں ایسی صفت خداوند والی
Verse 127سدا گلاب تیرا مکھ تازہ کھڑیا سی کس باغوں کس دا خانا روشن آہا تیرے روپ چراگوں
Verse 128لڑکی کیہا سن وے بھائی پچھ نہیں گلّ ساری تیرے وانگو میں بھی آئی وخت قضیے ماری
Verse 129دور دراز میری گلّ لمی بے انداز کہانی بھائی کجھ نہ پچھ میرے تھیں میں ہاں درد رننجانی
Verse 130جے میں دکھ قضیے پھولاں بھڑک لگے اگّ چھاتی توں بھی جھلّ نہ سکسیں مولے سڑسیں وانگر باتی
Verse 131صیف-ملوک کیہا میں اگے سڑ سڑ ہویا سجی جلنے دا نہیں صرفہ مینوں رکھ نہیں گلّ کجی
Verse 132نام نشانی حالَ حقیقت کھولھ سنائیں مینوں درد ونڈے گلّ کھلے ملدا دردی ساتھی جینوں
Verse 133دکھیئے دی گلّ دکھیا سندا قیمت قدر پچھانے کی دکھیا جو دکھیئے اگے دسے نہیں وہانے
Verse 134جیوں دکھیئے نوں دکھیا مل کے ہنجھو بھر بھر روندا سکھیئے تائیں تکّ کے سکھیا ایسا خوش نہ ہندا
Verse 135ماتم والے دے گھر ناریں جا منہ پلے پاون دکھیا تکن تاں دکھ اپنے پچھے باجھ سناون
Verse 136لکڑ اپنے رکھوں وچھڑی تار وچھنی سنگوں دونویں رلیاں دسن لگیاں کوک سناون چنگوں
Verse 137پہلاں اپنا نام دسالیں سوکھے گلاں کریئےہک دوجے دے واقف ہو کے نال اتفاکے مریئے
Verse 138لڑکی کیہا ہن میں دساں کنّ دلے دے لا توں میرا نام بلاندے آہے گھر وچ ملکہ خاتوں
Verse 139میں ساں بیٹی بادشاہے دی بہت لڈکی گھر وچ باپ میرا سلطان ملک دا سراندیپ شہر وچ
Verse 140اوہو تاج تخت دا سائیں کردا حکم چوپھیرےفوجاں لشکر مال خزانے رکھدا گھنے گھنیرے
Verse 141تریوے اسیں اوہدے گھر دھیاں ہک اساڈا بھائی عیشاں خوشیاں موجاں اندر چارے ساں ہک جائی
Verse 142کوئی کسے تھیں گھڑی نہ وسدے نہ بھیناں نہ بھائی اچنچیتی پیا وچھوڑا ڈاہڈھے قلم وگائی
Verse 143نجّ جنیندی ماں تتی نوں یا جمدی مر ویندی کاہنوں دودھ پلائیوسُ مینوں زہر گڑھتی دیندی
Verse 144بھیناں ویر وچھنے میں تھیں بابل مائی سئیاں لڑوں ترٹی کونج نمانی پنجریاں وچ پئیاں
Verse 145گلّ سناندی ملکہ خاتوں ہنجھو بھر بھر رنی کہندی ویرا بھیناں نالوں ایوں کر میں وچھنی
Verse 146ساڈا سی اک باغ ہزاری خوب طرحاں دا بنیا سدا رہے رنگ لایا اوتھے گلاں پھلاں گھنیاں
Verse 147چوہیں پاسیں باغ بغیچے جا آہی وچ واندیاس جائی وچ بنگلا بنیا صفت نہ کیتی جاندی
Verse 148چترکاری بے شماری خوب سبھے تدبیراں تتر مور چکور لکھائے ہور کئی تصویراں
Verse 149بہت صفائی تے رشنائی رونق باہر انتوں دنیاں اتے سی اوہ گردا بنی نشانی جنتوں
Verse 150اس بنگلے دے ہیٹھ اگیرے حوض آہا اک بھائی ترے سے اندر تریہاں سیاں دی چڑیائی لمیائی
Verse 151اس ہوزے دے چوہیں پاسیں شیر سنہری چارے شیراں والی صورتَ دسدے بہت زوراور بھارے
Verse 152دنہ شیراں دے مونہوں پانی وگ وگ ہندا جاری دوجے دو سن پیندے جاندے حکمت بنی نیاری
Verse 153بنگلے اندر کھیڈن جائیے سدا اسیں رل بھیناں ہسن کھیڈن کم ہمیشہ غم دا نام نہ لینا
Verse 154حوض اندر سی کشتی رکھی پھیر اوہدے وچ تریئےہر ہر پاسے باغاں اندر سیر خوشی دے کریئے
Verse 155اک دن کرنا ربّ دا ہوئیاں مارے پر تکدیرےہارے طالع لیکھ متھے دے الٹائے تکسیرے
Verse 156بھیناں نال ہمیشہ وانگر پے کشتی وچ تریاں غیبوں بھاء تتی دے پئیاں آن کلاماں بریاں
Verse 157اچنچیت ہک پنکھی چٹا اڈدا اڈدا آیا وڈا قد زوراور بہتا انت نہ جاندا پایا
Verse 158پٹاں تے دھر زور پنکھیرو جھٹاں اتے آیا دہشتناک ہوئیاں سبھ سئیاں خوفے نے جھلّ پایا
Verse 159کشتی اندر صحیح سلامت رہِ گئیاں سبھ سئیاں میں نکرمی بھیڑی جرمیں پنکھی دے ہتھ پئیاں
Verse 160دہشت خوف اوہدے نے مینوں پایا جھلّ اجیہا مردے وانگ ہوئی بے طاقت ہوش سمبھال نہ رہا
Verse 161خبر نہیں اس کیکر چایا کہڑے رستے آندا کتنا دور ایتھوں گھر ساڈا کس طرفے راہ جاندا
Verse 162جس ویلے میں اکھ اگھاڑی ہوش نویں سر آئی اپنا آپ اس تختے اتے ڈٹھا ایسے جائی
Verse 163نہ اوہ کشتی نہ اوہ سئیاں نہ اوہ حوض بغیچے نہ اوہ پنکھی نظریں آیا دوش کہدے سر دیچے
Verse 164ہک جوان رنگیلا ڈٹھا بیٹھا اگے میرے صورتَ سورج وانگ نورانی روشن کرے ہنیرے
Verse 165جس ویلے میں اس ولّ ڈٹھا لگا کرن سلاماں ہتھ گھمائے صدقے جائے کردا ترت کلاماں
Verse 166میں سلام نہ جھلیا اگوں رہیوسُ چپّ چپاتی کہن لگا اے دلبر لڑکی توں ہیں میں پچھاتی
Verse 167مینوں بھی ہے تدھ پچھاتا کون کوئی میں بندہ کہڑے دیس ملک دا راجا کہڑے شہر وسندا
Verse 168میں اگوں پھر بولی رکھی میں کی جاناں تینوں نہ ڈٹھوں نہ بھاکھیوں اگے نہ ہن بھاویں مینوں
Verse 169اس جوانے ایہہ گلّ سن کی چھوہی پھیر کہانی کہندا مینوں نہ کر خفگی سن گلّ بیبی رانی
Verse 170نیچ جوان نہیں کوئی میں بھی قلزم دا شاہزادہ باپ میرے دا باپ تیرے تھیں راج اقبال زیادہ
Verse 171نکی سیں تد صورتَ تیری مینوں نظریں آئی ڈیناں وانگو ظالم نیناں سانگ کلیجے لائی
Verse 172بادشاہی دا ذوق نہ رہا شوق تیرے دل پھڑیا عیش خوشی دا رہا نہ چیتا لوڑے تیری چڑھیا
Verse 173مدت ستّ برس میں ہوئے طلب کمال تیری وچ رات دہاں چھہِ بہندا رہا خواہش بھال تیری وچ
Verse 174کھاون لاون کجھ نہ سمجھاں نہ نیندر بھر ستا چھت پرتّ بتیرے کیتے متّ کوئی چلے بتا
Verse 175کتنی وار وٹائی قعیاں ظالم عشقَ اکایاںزبر پیا دل صبر نہ رہا تدھ تے چتّ وکایاں
Verse 176تینوں پکڑ لیاون کارن کیتے جتن بتیرےستاں برساں وچ نہ لگا دا میرا سنگ تیرے
Verse 177ترلے ہاڑے بہتے کیتے پیش نہ گئیا کوئی توں معصوم نابالغ رکھیں پاکی سر منہ دھوئی
Verse 178میں بھی دیوتیاں وچ آہا سپاہ-سالار کہاندا نال تیرے کجھ زور نہ چلیا اکّ گیا غم کھاندا
Verse 179دیواں تائیں قوت بہتی کتنے آسن کردے پل وچ ودھدے پل وچ گھٹدے چھپن وچ نظر دے
Verse 180ہوروں ہور بناون صورتَ بن سکدے کئی چیزاں کدے ڈراون ویری دسدے کدے مثال عزیزاں
Verse 181آدم ہے کی چیز بیچارا نال اوہناں دے پوٹی جھٹّ اندر چا کھڑدے ایویں الّ کھڑے جیوں بوٹی
Verse 182پر ہک لیکھے آدم ڈاہڈھا پتہ تسانوں دیواں ظاہر باطن پاکی ہووے پیش نہیں پھر دیواں
Verse 183ظاہر پاکی جسے جامے جے بندے نوں ہووےظاہر دے جنّ بھوت نہ پونہدے جتھے جا کھلووے
Verse 184باطن پاک ہووے جس نیت اندر وچ صفائی ویری دیو ابلیس لئینے پیش نہ جاندی کائی
Verse 185ایہناں گلاں اندر وڑیاں قصہ ہے ٹٹّ جاندا سدھی صاف محمد بخشا چلیں بات سناندا
Verse 186ملکہ خاتوں گلّ سناندی صیف-ملوکے اگے اس دیوے پھر مینوں کیہا واہ میری کد لگے
Verse 187جاں جاں جسا جامہ تیرا پاک آہا ہر میلوں میرا زور نہ ٹریا کوئی بچیا ایس تفیلوں
Verse 188جس ویلے ہن بالغ ہوئی آئی حیض-پلیتیداء لگا تد چاء لیائیوسُ آس پوری ربّ کیتی
Verse 189خطر جمع تسلی کر توں خطرہ رکھ نہ جھورا ماں پیو بھیناں بھائیاں والی حرص نہ رکھیں بھورا
Verse 190توں معشوق میری میں عاشق اس تھیں کون چنگیرا شہر ولایت اتے کرساں راج حکم سبھ تیرا
Verse 191دشمن تیرے گھائل ہوسن خوشیاں عیشاں تینوں ہور کسے دی چاہ نہ رکھیں جان پیارا مینوں
Verse 192جوڑی جڑی کڑی لوہڑے دی یاری کیتی بھاگاں میں راجا توں رانی ہوسیں وسسیں رنگاں راگاں
Verse 193چا نہ رکھیں دیس وطن دا ایہو وطن بنائیں وہوٹی جدوں ویاہی جاندی روندی پا کہائیں
Verse 194بنے نال بنے جد الفت پیکے یاد نہ رہندے دوئیے جی اکٹھے ہوون خوشیاں کر کر بہندے
Verse 195ماپے بھائی بھیناں سئیاں نہ ہن مکھ وکھاوناوہ نہیں آ سکدے ایتھے نہ ہے تیرا جاون
Verse 196ایہہ ولایت پریاں والی دیوتیاں دے خانے آدمیاں دا آون اتھے ناہیں کسے بہانے
Verse 197اصلوں آدم ذات اس جائی نہ آیا نہ عاصی ہک آدم دا خطرہ مینوں متّ اوہ پھیرا پاسی
Verse 198خوب جوان بہادر سوہنا ہوگ شاہزادہ کوئی لمی بہت کہانی اس دی ترت بیان نہ ہوئی
Verse 199مینوں بھی ہے خوف گھنیرا اس دلیر جوانوں علم کلاماں وچوں ایہو آہی خبر اسمانوں
Verse 200جاں ایہہ گلاں دیوے دسیاں تاں میں بہتی رنی ہائے ہائے ربا بھیناں نالوں رہساں کویں وچھنی
Verse 201ماپے پئے سیاپے کرسن کی جاپے کی ہوسی بھیناں ویناں کر کر مرسن ویر پیا نت روسی
Verse 202سئیاں جس دن بھورھے پئیاں جدوں پرھے وچ گئیاں کرسن یاد سواد نہ رہسی ہنجھو روسن پئیاں
Verse 203ایہو درد میرے دل آئے رو رو کوکاں ماراں ماپے بھیناں بھائی باجھوں نہ میں جھٹّ گزاراں
Verse 204اوہناں باجھوں صبر نہ مینوں نہ توں دل نوں بھاویں بھانویں رنج میرے پر ہو کے جانوں مار گواویں
Verse 205جاں ایہہ گلّ سنی اس دیوے چڑھیؤسُ غضب ہنیری اس تختی تے جادو کرکے قید کیتی جند میری
Verse 206مردے وانگ اس تختے اتے پئی رہاں ہر ویلے بوہے اتے رہن کھلوتے پاہرو شیر مریلے
Verse 207اوہو دیوَ مہینے پچھوں پھیر میرے ولّ آوے تختی کڈھ لئے سر ہیٹھوں ہوش میرے تن پاوے
Verse 208کھانے دانے چنگ چنگیرے رنگ برنگی چیزاں حاضر آن کریندا اگے پچھدا وانگ عزیزاں
Verse 209کتنی مدت ہے تدھ ستیاں کتنے روز لنگھائے میں کہندی ہک سائت گزری اوہ پھر ہاسہ پائے
Verse 210کہندا مینوں ستیاں تینوں ہویا ہک مہینہ تیرے بھانے سائت گزری سن توں یار نگینہ
Verse 211میں اگے پھر کھانے دھردا خوب طرحاں دے پکے جتنی طلب ہووے میں کھاواں خوش ہندا اوہ تکے
Verse 212جاں پھر مینوں تازی تکے کر کر منت زاری کہندا مینوں اے معشوقہ ! نال میرے کر یاری
Verse 213اوہ گل اس دی یاری والی مہرا لگدی مینوں سدھے منہ نہ بولاں کہندی بھسّ سر پاواں تینوں
Verse 214پھیر میرے تے غصے ہو کے جادو پا سوالے تختی وچ ہنر کجھ کرکے ہوش سمبھالا ٹالے
Verse 215آپوں جاندا پا مہینہ پھیرا ات ولّ مارے ایسی ڈولے قیدے اندر میں دس برس گزارے
Verse 216ملکہ خاتوں دی گلّ ساری صیف-ملوک شاہزادہ سن حیران تئجب ہویا کردا فکر زیادہ
Verse 217ہک تھیں ہک چڑھندی ڈاہڈھی مشکل میں سر آوے ایہہ قلعہ اوہ دیوَ مریلے کویں ربّ بچاوے
Verse 218جائ نہ اپنے چھپن جوگی کت ولّ چھپاں نساں دیوے نے ہن جان نہ دینا مارگ دے دے کساں
Verse 219اپنی گلّ رہی اک پاسے خیر جویں کجھ ہوسی پر ایہہ لڑکی قیدے اندر پئی ہمیشہ روسی
Verse 220ملکہ خاتوں نوں چھڈّ نسن ہے نامردی خاصی یا میں بھی مر جاساں اتھے یا اس ہوگ خلاصی
Verse 221ایہہ بھی آدم میں بھی آدم نالے ویر بلائیوسُربّ سببّ بنایا کائی تاں اس جائی آئیوسُ
Verse 222دیوے نال لڑائی کریئے جس دیوے تس اﷲ ہمت اندر فرق نہ رکھیئے آپ کرے متّ بھلا
Verse 223مرداں دے کوئی پچھے پوندا اوکڑ اوسر ویلے مرد ونگارے کدی نہ ہارے وانگر شیر مریلے
Verse 224ہک شاہزادی دوجا لڑکی تریجا ذات زنانی چوتھا رو کے حالَ سنائیوسُ چھڈّ نسن شیطانی
Verse 225مشکل والی دے سر اتے مرد جدوں آ چکا زاری سن کے یاری کرسی چھوڑ نہ جاسی سکا
Verse 226دیوے کولوں مرساں ناہیں جے زندگانی میری ملکہ خاتوں نوں چھڈّ نساں کی جوانی میری
Verse 227صیف-ملوک دلیری کرکے بیٹھا رکھ ہشیاری ملکہ کہندی ہے شہزادے دسی میں گلّ ساری
Verse 228توں بھی اپنی گلّ سناویں جو کجھ ہے سرورتیکتھوں آئیؤں مطلب کہڑا چلیوں کہڑی دھرتی
Verse 229نازک بدن شاہزادہ دسیں صورتَ وانگ ملوکاں سوہنا دانشمند اکابر سالک سلک سلوکاں
Verse 230رستم وانگ بہادر لگیں نادر پٹھ بدن دی سبھ ہتھیار سنگار سہائے انگ پوشاک بہمن دی
Verse 231عمر اوایٔل روپ زیادہ باغ بہار چمن تھیں کس مصیبت بھاری تینوں آندا کڈھ وطن تھیں
Verse 232آدم زاد نہ پجدا اتھے باجھوں پری وسیلے کس آفت نے چا لیاندوں آ پہتوں کس حیلے
Verse 233صیف-ملوک کیہا اے ملکہ آہے لیکھ اولے پچھن تھیں کی حاصل تینوں چھیڑ نہیں گھاؤ الے
Verse 234پچھ سرود نہ مستاں کولوں ہندوستان نہ فیلوں سڑیاں نوں نہ ساڑیں ملکہ باز آ ایس دلیلوں
Verse 235لمی گلّ کہانی میری باہر انت حسابوں چھیڑ نہیں کی لینا ملکہ ایس سوال جوابوں
Verse 236تھوڑی مدت وچ نہ مکدا لما قصہ میرا دیوَ آوے تکّ تینوں مینوں کرسی بیرا بیرا
Verse 237وخت قضیے گندا ہویا میں رہاں وچ زاری اچنچیتی آوے سر تے بنے مصیبت بھاری
Verse 238مینوں ویکھ سڑے کھائے غیرت بھڑک لگوسُ اگّ سینے یا مارے یا پکڑ وگاوے ہوری کسے زمینے
Verse 239ملکہ پچھدی کی دہاڑا چنوں ہے دن کتنا کیہا شہزادے روز فلانا گیا مہینہ اتنا
Verse 240ملکہ کہندی نہ کر خطرہ رہندے پنج دہاڑے ایہناں دناں وچ آوگ ناہیں توڑ مہینہ چاڑھے
Verse 241جس دن ہوگ اوائی اس دی میں دسّ ساں اس ویلے تیرے نال برابر اس نوں سچا ربّ نہ میلے
Verse 242رکھ تسلی پکی دل وچ کھولھ حقیقت ساری وید اگے پھر دسن لگا اپنی مرض ازاری
Verse 243مصر شہر دا میں شاہزادہ پلیا بہت لڈکاماؤ پیو گھر پتّ پیارا آہا مہیئیں ہکا
Verse 244شکل بدیع-جمال پری دی لکھی ہوئی ڈٹھی اگّ لگی کجھ آب نہ رہی ہو ملیا جو چٹھی
Verse 245بیڑا ٹھیلھ سمندر میرا ماپے گھر نوں پرتے اگوں شاید یار وچھنا قہر میرے سر ورتے
Verse 246سطر ہزار جو بیڑے آہے غرق ہوئے وچ پانی بھلے بھلیرے یار وچھنے لگی کلیجے کانی
Verse 247شاید یار پیارا بھائی خاصہ دل دا جانی سوہنی صورتَ سبھنیں گلیں آہا میرا ثانی
Verse 248اس نالوں جد پئی جدائی وا ہجر دی وگی پھٹے اتے لون لگائیوسُ سانگ دوبارہ لگی
Verse 249اول آخر تیک کہانی ذرا ذرا کر دسے گلاں کردا آہیں بھردا ہنجھو بدل وسے
Verse 250باغ-ارم کوئی جا سنیندی اوتھے اس دا ڈیرہ باپ میرے کئی وسّ لگائے دسّ نہ پئی چوفیرا
Verse 251مینوں بھی ہن مدت گزری ایسے لوڑے چڑھیاں اج توڑی کجھ پتہ نہ لگا پانی پیا نہ سڑیاں
Verse 252عشقَ ہوراں نے سکھ چھڈائے دیس وطن گھر ماپے شہزادے تھیں وہشی بنیوسُ ڈاہڈھے پئے سیاپے
Verse 253میرے مگر پیا اوہ ظالم لین نہ دیندا ساہی ہر ہر پاسے جھوٹے دیوے پائِ گلے وچ پھاہی
Verse 254مورت والی نے کر جادو میں نمانا مٹھا کیتوسُ ظلم قصائیاں وانگر لتاں دے دے کٹھا
Verse 255بن آئی جند نکلے ناہیں کوئی جہان نہ جھلدا ڈاہڈھے دے ہتھ قلم محمد وسّ نہیں کجھ چلدا
Verse 256بھمبل بھوسے کھاندا پھردا ہر جنگل ہر غارے چھٹے شہدی جان عذابوں جے کوئی آفت مارے
Verse 257سنگی ساتھی سبھ کھڑائے جو بھنجال غماں دے اپنا ساس کرنگ نہ چھڈیا رہے شمار دماں دے
Verse 258عشقَ مہار پھڑی ہتھ پکی وتے جھلّ چراندا نکّ نکیل نہ ہٹن دیندا اے منا جو فرماندا
Verse 259راس ستارہ راس نہ ہندا نت اساس چلاندا ساس اداس نہ باس سجن دی بہتر جے مر جاندا
Verse 260کیہا گناہ کبیرا کیتا شامت جسدی بھاری بھاہ المبے دوزخ والے سڑدے عمر گزاری
Verse 261کتے بدیع-جمال پری دی جیوندیاں دس پوندی لوڑن دا وشواس نہ رہندا آس ملن دی ہوندی
Verse 262مینوں بے وفائی اسدی بہتر لکھ وفایوںوڈی خطائی کول سجن دے نیناں پاک ختایوں
Verse 263توڑے عشقَ پری دے اندر کیتی نہیں خطائی پھر بھی پور تقصیر کہاواں کرے کویں اشنائی
Verse 264جیوندیاں کوئی سکھ سنیہا آیا نہیں پری دا پتہ نہیں کجھ ہونا اس نوں میری رنج جری دا
Verse 265آس سجن دی رحمت اتے مویاں متے سمبھالے سر منگے تاں حاضر کریئے ہتھیں پکڑ ہلالے
Verse 266وانگ شمع دل روشن عشقوں جاں سر شمع کپیندا سر کپن دا درد جھلن تھیں نور زیادہ تھیندا
Verse 267در یاراں دے مرنا بہتر اس بن جیون نالوں طرف پری دی راہ نہ لبھدا اتنی دوڑوں بھالوں
Verse 268نال پری دی مورت ڈردے نہ دکھ کھولھ سنائے نازک انگ پری دی مورت متّ ایہہ بھی اکّ جائے
Verse 269تپ تاثیر غماں دی کولوں پیڑ سرے نوں لگے پیڑاں جوگا ہے دم میرا سے پیڑاں جس اگے
Verse 270پتہ بدیع-جمال پری دا یا اس باغ-ارم دا جے مینوں ہتھ لگدا کدھروں اوہ سی دارو غم دا
Verse 271دلبر کارن گھر در چھٹے اٹک نہ رہیوسُ ڈرکے جان تلی دھر لوڑ کراں گا کدے تے ملساں مرکے
Verse 272صیف-ملوک ایہہ گلاں کرکے رناں نال غماں دے ہو بے تاب پیا جیوں ہندی جان لباں پر ماندے
Verse 273ملکہ کیہا باغ-ارم دی جے دس پاواں تینوں نالے خبر پری دی دیواں کہو کی دیسیں مینوں
Verse 274پتہ بدیع-جمال پری دا یکّ-ب-یکّ سناواں کی انعام ملیگا مینوں دسیں وانگ بھراواں
Verse 275ملکہ خاتوں دی گلّ سن کی صیف-ملوک رنگیلا آہیں ڈھائیں بھر بھر رنا ہو گیا رنگ پیلا
Verse 276اچنچیت تراہے وانگو کھل گئے دل دیدے جیوں کر روزیداراں دسدا چن مبارک عیدے
Verse 277یا جیوں سنیا شاہ علی نے کلمہ بانگ نبی دا جیوں کر مچھلی نوں ہتھ لگا چشمہ خضر ولی دا
Verse 278یا جیوں روز قیامت والے سخن شفاعت والا اؤگنہاراں دے کنّ پیسی ہوسی روح سکھالا
Verse 279جیوں یعقوب نبی نوں آئی مصر ولوں خشبوئیجیوں یوسف دے مل وکن دی خبر زلیخاں ہوئی
Verse 280نعرے مار رنا شاہزادہ کرکے ہائے ہائے ہوش سمبھال چلے ہو راہی نین ونجن جھٹلائے
Verse 281این شراب بے ہوشی والا لگا پین پیالہ پھیر طبیعت جائی رکھیوسُ کرکے بہت سمبھالا
Verse 282ملکہ خاتوں نے جد ڈٹھا شہزادے دا رولا نال پیار لگی فرماون سن بھائی مکبولا
Verse 283قسم کراں میں ربّ سچے دی جس بن ربّ نہ دوجا اوسے دی سبھ زہد عبادت اوسے دی سبھ پوجا
Verse 284جے میں گھر پیو دے ہوندی سراندیپ شہر وچ نال بدیع-جمال پری دے تدھ ملاندی گھر وچ
Verse 285پر ہن کجھ نہ چارہ چلدا کی وسّ لاواں بندی تیری وید ہوواں جے چھٹاں قید میرے تن مندی
Verse 286دکھ قضیے تیرے سن کے بھرم لگا دل میرے مرنے تیک نہ جاسن مینوں ایہہ افسوس گھنیرے
Verse 287قید اپنی دا غم نہ رہا بھرم لگا ایہہ بھارا جے توں گھر وچ ملدوں مینوں دسدی یار پیارا
Verse 288میں ہن قید ہوئی وچ ٹاپو محکم کوٹ چوپھیرےڈاہڈھی بند خلاص نہ ہندی جے چلاں سنگ تیرے
Verse 289ملکہ دی گلّ سن شاہزادہ ہو کے مثل یتیماں اٹھ کھلوتا تختے اتوں کرن لگا تازیماں
Verse 290ملکہ اتوں ہتھ گھمائے صدقے ہو ہو جائے چمّ زمین سلاماں کردا مڑ مڑ سیس نوائے
Verse 291جس رستے توں آئی ملکہ میں صدقے اس راہوں جس مونہوں ایہہ گلّ الائی جند واری اس ساہوں
Verse 292جہناں اکھیں دلبر ڈٹھا اوہ اکھیں تکّ لئیاںتوں ملیئیں تاں سجن ملیا ہن آساں لگّ پئیاں
Verse 293ملکہ ولّ ہتھ بنھ کھلوندا روندا نیواں ہوندا اکھیں پانی ڈل ڈل کردا ہنجھو ہار پروندا
Verse 294صبر قرار آرام نہ رہا بہت ہویا دل تتا ملکہ اگے منت کردا دس بھینوں کوئی پتہ
Verse 295ملکہ خاتوں کہندی ویرا بیٹھ تحمل کرکے خوب طرحاں متوجا ہوویں کنّ میرے ولّ دھرکے
Verse 296یار بدیع-جمال پری دی دساں کھولھ کہانی پکا پتہ نشانی دیواں اگوں ربّ ملانی
Verse 297صیف-ملوک نچلا بیٹھا کنّ دلے دے دھرکے سر دھڑ جسا جامہ رکھیا ملکہ ولّ کنّ کرکے
Verse 298ملکہ خاتوں گل پری دی آن شروع پھر کیتی خوش آواز فصیح زبانوں نالے دکھاں سیتی
Verse 299ہک آواز زنانہ آہا دوجا جیبھ رسیلی تریجا دانشمند اکابر کردی گلّ رنگیلی
Verse 300خوش آواز ہووے جے دکھیا سروں ادا سہاوے پتھر دل نوں موم کریندا جاں کوئی قصہ گاوے
Verse 301اوہ اوازا جیبھ رسیلی اوہ دلبر دا قصہ اوہ عاشق سی سننے والا سن سن لیندا حصہ
Verse 302شوق جدھے تھیں شاہی چھڈی گھر در دیس بھلائی براں-بحراں کوہ قافاں وچ مر مر عمر لنگھائی
Verse 303جاں اس کوئی محرم لبھے دکھیئے دکھ ونڈائےدسے سبھ کہانی اس دی دسّ پکیری پائے
Verse 304نال ادا آواز بھلیری بات صحیح سناوے کرو قیاس محمد بخشا کیسی گلّ سکھاوے
Verse 305ملکہ کہندی سن وے ویرا رکھیں یاد سنائیاں اسیں تریوے بھیناں آہیاں ہکسے پیٹوں جائیاں
Verse 306بھین میری ہک بدرا خاتوں جاں اوہ کچھڑ ہیسی مماں پی پنگھوڑے کھیڈے صورتَ موتی جیسی
Verse 307ہک دن ماں میری اس ویلے ہوزے اتے آئی جس ہوزے توں پکڑ لیاندا مینوں دیو قصائی
Verse 308داعیاں خدمتگاراں کھلھیاں ہر اک دا مکھ لالا ماؤں کول پنگھوڑا ٹکیا بدرا خاتوں والا
Verse 309نرم کباب بھجن تر-او-تازے دھم گھتی خشبوئیچاول کلچے رنگ برنگی نئمت چیز نروئی
Verse 310اس ہوزے دے دندے آہا ماں میری دا ڈیرہ سر تے سایادار کھلوتا چھتری رکھ وڈیرا
Verse 311مائی میری سی کی تکدی قدرت نال خدائی رکھ اتوں اک بڈھی مائی دھرتی اتر آئی
Verse 312ماں میری دے کول پلنگ تے بیٹھی آن شتابی ماں میری نوں اس تھیں آئی دہشت بے حسابی
Verse 313بڈھی عورت ماں میری نوں کہندی رکھ دلاسہمیں گوانڈھن تیری بیبی نہ ڈر میتھوں ماسہ
Verse 314کوہ قافاں وچ گھر اساڈے راج حکومت ساڈی میں بھی بادشاہے دی بیگم بھاری ہے پتّ ساڈی
Verse 315شرستان سنہری جہڑا نبی سلیماں والا اوہ ہے وطن سہاوا میرا سندر دیس نرالا
Verse 316اس ملک وچ باغ-ارم دا اوتھے ہاں میں رہندی اوتھے محل چوبارے ساڈے جا ڈٹھیاں بھکھ لیہندی
Verse 317اس ولایت ساری اتے جسدی ہے سلطانی شاہ شاہپال اوہدا ہے ناواں اس دی میں زنانی
Verse 318بیگم خاص میں ہی گھر اس دے اس وڈی سرداری دیواں پریاں سبھناں اتے حکم اوہدا نت جاری
Verse 319شاہ شاہپال میرا جو خاوند اوہ بیٹا شاہ رخ دا شاہ رخ دا پیو نبی سلیماں بن داؤد فرخ دا
Verse 320دائم اسیں تسیں ہمسائے عادی دے شہزادے پریاں اسیں رہیئے وچ پردے ظاہر آدم زادے
Verse 321مینوں اک مہینہ ہویا اسس باغے وچ آئیاں نوکر چاکر خدمت والے بہوں دھن نال لیائیاں
Verse 322ہن میں پرط گھراں نوں چلی رہو تسیں سکھ واسی ایہہ دھرتی ایہہ باغ تساڈے ہوئے اسیں اداسی
Verse 323کھانے تیرے دی خشبوئی مغز میرے وچ پہتیتاں میں کول تیرے آ بیٹھی رغبت اٹھی بہتی
Verse 324بھرکے تھال جواہر موتی ماں میری نوں دیندی کہندی ہن توں بھین دھرم دی میں سہیلی تینڈی
Verse 325ایہہ تحفہ میں دتا تینوں کیتا بھائی چارا ورتن کراں محبت والی بنیا راہ ہمارا
Verse 326ماں میری نے ات ولّ ڈٹھا سخن اوہدا دل دھریا کی تکدی ہتھ تھال پری دے دھڑی وانگو بھریا
Verse 327مروارید زمرد سچے یاکوتاں رنگ لایا مانک موتی ہیرے پنے لعلاں تھال سہایا
Verse 328ستّ گوہر شب-تاب ٹکائے سبھناں اتے کرکے رات ہنیری روشن ہندی جے رکھیئے ہتھ دھرکے
Verse 329بنگلے باغ تلاب چوپھیرے ہو گئی رشنائیایہہ تحفہ اس بڈھی دتا لیا اساڈی مائی
Verse 330ماں میری دی گودوں اس نے بھین میری پھر چائی بہت پیار محبت کرکے ممے اپنے پائی
Verse 331نال خوشی دے دودھ پلایا بدرا خاتوں پیتا پھیر پری دی ہوئی تیاری اڈن تے دل کیتا
Verse 332ماں میری نے کیہا اس نوں سن توں میریئے بھینے دھی میری تدھ ممے پائی میں بھی بدلے لینے
Verse 333دھی اپنی توں دسیں مینوں میں بھی اس نوں چاواں ممے پاواں دودھ پلاواں صدقے صدقے جاواں
Verse 334جلدی حکم پری نے دتا خدمتگاراں تائیں آندا چاء پنگھوڑا اوہناں رکھیا آن اتھائیں
Verse 335ماں میری نے پلہ چایا دھی پری دی ڈٹھی سوہنی ہیر زلیخا سسیؤں شیریں شکروں مٹھی
Verse 336شمع نورانی خاور والی ویکھ اس نوں شرماوےجنت دی کوئی حور حسن دی تاب نہ مول لیاوے
Verse 337جیوں انار پکے دا دانہ ہوئے جلالابادیموتیں وانگ صفائی جسے لالوں تاب زیادی
Verse 338صورتَ ویکھ ہوون دلبریاں پریاں ہور تمامینیناں اگے مرگ شکاری ہندے ویکھ سلامی
Verse 339ایسا حسن اس لڑکی اتے جے اوہ ہندی ظاہر ہر ذرہ ہو سورج چمکے روپ حسابوں باہر
Verse 340ہر ہر وال اوہدے وچ آہا سو سو پیچ گمانی صورتَ دا کجھ انت نہ آوے کاریگری ربانی
Verse 341جھنڈ اوہدی دیاں والاں وچوں مغز چڑھے خشبوئیویکھن سائت اساڈی مائی بے خود بے سدھ ہوئی
Verse 342ذرا سرت سنبھال نہ رہیوسُ غش اجیہی آئی کر دتی بے تاب شتابی تاب شکل دی مائی
Verse 343اس لڑکی دی مائی ڈٹھا ماں میری دا چالا کول اوہدے کوئی باغ-ارم دا پھل سی خشبوئی والا
Verse 344اوہ پھلّ ماں میری دے سر تے اس پری نے لایا سائت پچھوں ہوش سمبھالی جگرا جائی آیا
Verse 345ماں میری پھر آکھن لگی حمد خداوند تائیں واہ واہ قادر پاک کاریگر اس حکمت دا سائیں
Verse 346قطرے آب منی دے وچوں ایسی شکل بناندا پتھر تھیں کر نظر کرم دی چن سورج چمکاندا
Verse 347خسخس جڈا بیج ناچیزا خاکو اندر رلدا اس تھیں رکھ بلند بنائے رنگ برنگی پھلّ دا
Verse 348پانی بوند اسمانی آوے سپاں دے منہ پیندی اس تھیں درِ-یتیمِ بنائے قیمت پوے نہ جیندی
Verse 349کالے پتھر دھپے سڑدے اندر قان بدخشاںایہناں وچوں لئل بنائے بے بہا درخشاں
Verse 350خلقت اس دی رنگ برنگی دھنّ اوہ سرجن والا آپو اپنی صورتَ دتیؤسُ ہک تھیں ہک اجالا
Verse 351لکھ کروڑاں ہو ہو گزرے اس دھرتی وچ مٹی سندر صورتَ ظاہر کر کے پھیر رلاوے مٹی
Verse 352ماں میری نے اس لڑکی نوں کچھڑ اپنے چایاماواں وانگر ممے پائی مٹھا دودھ پلایا
Verse 353اس لڑکی دی ماں پری نے کیتا قول زبانی جب لگّ دھی میری دی ہوسی دنیاں تے زندگانی
Verse 354تیرا ہک بھلاسی ناہیں چھوڑ وفا نہ بحثیہر مہینے وچ ہک ہفتہ پاس تیرے آ رہسی
Verse 355دھی میری تے تیری بھیناں اسیں دوئے بھی بھیناں فرض اس تے ہر ہفتے اندر درسن تیرا لینا
Verse 356جیسی اس دی مائی میں ہاں توں بھی ایسی مائی کیتی شرط میری نہ بھنسی جے ایہہ میری جائی
Verse 357بدرا خاتوں ایس سہیلی اس دی ایہہ سہیلی خیریں خیریں میلے ایہناں پاک خداوند بیلی
Verse 358بدرا خاتوں اڈ نہ سکدی نال اوہنوں جے کھڑیئےنالے خوف متے اوہ کھاوے جاں دیواں وچ وڑیئے
Verse 359نہیں تاں نال سہیلی اوہ بھی باغ-ارم دا تکدی ایہو اتھے آیا کرسی اوہ نہیں جا سکدی
Verse 360شرط اقرار پکے رنگ کرکے اڈّ گئیاں اوہ پریاں بول اتے ہن پہرہ دیون اس دن تیک نہ ہریاں
Verse 361اوہ بدیع-جمال پری سی لڑکی وچ پنگھوڑےچوداں برساں دی ہن ہوئی چڑھی ہوویگی چوڑے
Verse 362جب لگّ میں رہی اس جائی تکدی رہی تماشہ اس بدیع-جمال پری دا دائم ہے ایہہ خاصہ
Verse 363ہفتہ ہک مہینے وچوں باغ اساڈے کٹدی صورتَ حسن اوہدے دی تابوں جوت شمع دی گھٹدی
Verse 364روئے زمیں تے ثانی اس دا صورت مند نہ کائی نہ پریاں نہ آدم وچوں ساری وچ لوکائی
Verse 365صیف-ملوک کیہا ہے ملکہ بھین دھرم دی لگیں سچ کہیں کہ کوڑ خوشامد کرکے مینوں ٹھگیں
Verse 366ملکہ کہندی سن وے ویرا بخشے ربّ پناہاں اﷲ بھاوے کوڑ نہ آکھاں جے کوئی ڈھوئے پھاہاں
Verse 367کوڑے بندے ربّ نہ بھاون یمن زبان نہ رہندا گلّ اوہدی کوئی مندا ناہیں سبھ جگ جھوٹھا کہندا
Verse 368بے اعتبار خوار جگت تے کوڑ الاون والا کی لاچار کراں میں تیری جھوٹھ خوشامد لالا
Verse 369قسم کراں میں ربّ سچے دی جو عالم دا والی جس نے خلقت پیدا کیتی روزی دے سمبھالی
Verse 370کیڑے ہاتھی چڑیاں بازاں سبھناں دا رکھوالا ہر ہک تائیں رزق پچائے کرکے خوب سمبھالا
Verse 371دنیاں تے جس پیدا کیتا آدم جنّ حیواناں بھلے بھلیرے روپ بنائے صورت مند جواناں
Verse 372سوہنی صورتَ تے جس پایا حسنِ دا چمکارا عاشق دے دل اگّ لگائی سڑدا نت بیچارا
Verse 373محبوباں نوں آن سکھائیوسُ ناز مخول مروڑاں خدی تکبر بے پرواہی تلخ جواب تروڑاں
Verse 374بے وفائی تے بے رحمی قہر ستم بے ترسی جند عاشق دی کرن نہ صرفہ کی ہویا جے مرسی
Verse 375عاشق دے دل اندر پائیؤسُ ازز نیاز ہزاراں خوف امید سمند غماں دے موجاں بے کناراں
Verse 376ترک سکھاں دے جال دکھاں دے سختی جند بدن دی دوہاں جہاناں وچ محمد حرص ہوا سجن دی
Verse 377جو یاراں نوں یار ملاوے سیوے پھٹّ جدائی ربّ غریب نواز ہمیشہ جسدی دھنّ خدائی
Verse 378سچو سچ سنائی ویرا جو گلّ اکھیں ڈٹھی کوڑوں سچ نکھیڑ دسالاں جے تدھ ہووے چٹھی
Verse 379ہائے افسوس جے پہنچاں اوتھے تاں ایہہ سچ دسالاںنال بدیع-جمال پری دے تینوں چل بہالاں
Verse 380ملکہ دی گلّ سن شاہزادہ وانگ گلاباں پھلاّ کردا شکر ہزار ہزاراں رحمت دا در کھلا
Verse 381سکا باغ دلے دا ہویا تازہ عبر-بہاروںجان حیران لگی پھر آسا دلبر دے اخباروں
Verse 382ناؤمیدی والی آتش دوزخ وانگو بلدی آس لگی ہن دس ارم تھیں سرد ہوئی کجھ جلدی
Verse 383اوہ کہانی ملکہ والی شہزادے دل بھانی کربلا دے تسے تائیں جیوں کر ٹھنڈا پانی
Verse 384جیوں پردیسی راہوں بھلے رات ہنیری اندر اچنچیتی چانن لایا چڑھ چودھویں دے چندر
Verse 385جیوں کر کئی مدت دے روگی ملیا وید شناسی آس لگی متّ ساس بدن وچ مولٰی پاک وساسی
Verse 386جیوں روڑے وچ بدل وٹھا لگی آس فصل دی بھکھے مال لدھی ہریائی کرپا ہوئی فضل دی
Verse 387ملکہ اتوں صدقے جاوے صیف-ملوک شاہزادہ کہندا توں احسان میرے تے حدوں کیتا زیادہ
Verse 388مینوں دسّ سجن دی پائیو خوب طرحاں دی پکی تدھ پچھے سر دیون لایق توں ہن میری سکی
Verse 389کوئی تدبیر ہووے تدھ مالم سجھی سنی سنائی کسے طرحاں اس قیدوں چھٹیں کریئے زور ازمائی
Verse 390ملکہ کہندی کیکر چھٹاں کجھ نہ چلدا چارہ ایہہ خیبر ایہہ کوٹ چوپھیرے ملک بدیس ہتیارا
Verse 391جسدی قیدے اندر میں ہاں دیوَ بہادر بھارا سٹھّ گز اچا قد مریلا زور اس بیشمارا
Verse 392راکس غول وڈیرے اس تھیں خوف ہمیشہ کھاونچالی دناں دے پینڈے اتوں نہیں اریرے آون
Verse 393باجھ اس تھیں اس جائی ناہیں پنکھی پر مریندا جانے والی چیز اس ٹاپو کوئی پھرن نہ دیندا
Verse 394سن گلاں شہزادے تائیں فکر پیا دل بھارا کویں ملکہ خاتوں چھٹے ربّ چھڈاون ہارا
Verse 395فکر تمیزاں کر کر تھکا راس نہ آوے کائی مکر فریب ہنر دا حیلہ ٹردا نہ اس جائی
Verse 396کوٹ وڈیرا چوٹ دیوے دی خوف کلیجہ کھائے راہ نہ لبھے داء نہ لگے ہک پناہ خدائے
Verse 397صیف-ملوک بیچارا ہو کے کردا وضو طہارت ابراہیم نبی دے دینوں کردا اٹھ عبادت
Verse 398امتّ خاص خلیل اﷲ دی آہا اوہ شاہزادہ دو رکاتاں نفل گزارے دل دا رکھ ارادہ
Verse 399پھر سجدے سر دھر کے رنا رو رو کرے دوائیں ربا تونہیں حافظ ناصر اوکھی سوکھی جائیں
Verse 400بے یاراں نوں یاری کرنیں آس تیری بے آساں ہر ڈھٹھے نوں آپ اٹھالیں کر مشکل کم آساں
Verse 401بخشش کرکے فیض پچاویں اؤگنہار انساناں رحمت تیری تھیں نہ امیدی ہندا کم شیطاناں
Verse 402توڑے ہاں بدکار گناہی اسیں بندے منہ کالے پھر بھی دائم فضل تیرے دی آسا رکھن والے
Verse 403لکھ مناں چرکین پلیتی شہراں اندر ہوندی پل وچ پاک کرے جس ویلے رحمت تیری پوندی
Verse 404توں غریب-مہمان نواز ہمیشہ اسیں بندے درماندے کرم کریں تاں ہے چھٹکارا بھلے ہاں کرماں دے
Verse 405تدھ باجھوں کوئی ساتھی ناہیں پھاتھی جان اولی توں چھڑکاویں تاں میں چھٹاں دے دشمن انگ-ملی
Verse 406مان تران نہ زور نمانے نہ کجھ شیخی میری ہکو پرنا تکیہ تیرا ہور نہیں دھر ڈھیری
Verse 407صیف-ملوک غریب شہدے دی کوک تیرے در سائیاں دیوَ غنیم یتیم بندے نوں کہسی وانگ قصائیاں
Verse 408تیری اوٹ پناہ خدایا ہور نہیں کجھ سجھدا جس دیوے نوں آپوں بالیں کد کسے تھیں بجھدا
Verse 409چڑیاں بازاں دا توں سائیں چڑیوں باز کوہاویںگوشت شیہاں سپاں والا کیڑے پا کھواویں
Verse 410توں بندے نہ چیزے ہتھوں دیواں نوں مرواندا واہ قادر دھنّ قدرت تیری انت نہ پایا جاندا
Verse 411میں غافل گمراہ تیرے تھیں بندہ پور تقصیراں نہیں عبادت تیری کیتی مگر پھراں تصویراں
Verse 412صورتَ دی ہک مورت تکّ کے بھجّ بھجّ مراں ازائیںآہا فرض میرے سر لوڑاں وحدت تیری تائیں
Verse 413ہر صورتَ وچ معنے تونہیں تیرا عشقَ نہ چایاصورتَ پچھے جھلا ہو کے اپنا جنم گوایا
Verse 414ماؤ پیو دی خدمت کرنی فرض میرے پر آہی اوہ بھی روندے چھڈّ کے ٹریا بہت کیتی گمراہی
Verse 415تیرا نام غفور سنیندا بخشیں میں نکارا ملکہ خاتوں نوں لے جاواں دیو مرے ہتیارا
Verse 416ملکہ خاتوں نے پھر کیہا سن توں ویر پیارا ہک تدبیر میرے دل آئی اس تھیں ہے چھٹکارا
Verse 417جے سلیمانی دو شاہ-مہرے ہتھ اساڈے آون اﷲ بھاوے تاں اس قیدوں اوہ سانوں چھڑکاون
Verse 418میں دیوے تھیں ہک دہاڑے پچھی سی گلّ ساری کی کجھ نام اس کوٹ تیرے دا کس دی ہے سرداری
Verse 419دیوے نے پھر دسیا اگوں ٹاپو ایہہ وڈیرا اسفند باش ہے نانواں اس دا راج حکم سبھ میرا
Verse 420پھر میں پچھیا ایس مکانوں آدمیاں دا واسا کتنا پندھ دراڈا ہوسی خبر نہیں میں ماسہ
Verse 421دیوے کیہا آدم اتھے مول نہیں آ سکدا آدمیاں دی جا نہ توڑے دیو وڈا بھی تھکدا
Verse 422آدمیاں دی واسی ایتھوں نہیں شمار کوہاں دا اڈن والی پری اگے بھی پینڈا برس دہاں دا
Verse 423ہک روایت ایہہ بھی ڈٹھی پینڈا ہک دہیں دا ایڈا فرق ہووےگا کیکر ناہیں عقل منیندا
Verse 424رستے وچ کوہ قاف اجاڑاں ندیاں انت نہ کوئی پریاں اتوں اڈدیاں جاون مشکل پندھ نہ ہوئی
Verse 425پھر میں پچھیا عمر تساڈی ہندی کتنی کتنی آدمیاں تھیں لمی چھوٹی یا اوہناں دے جتنی
Verse 426کہیوسُ عمر اساڈی وڈی آدمیاں دی تھوڑی پھر میں کیہا تیرے دم دی ہوسی کتھے توڑی
Verse 427کہیوسُ ستّ سے برساں توڑی میں حکومت کرساں سے برساں وچ عمر جوانی زور دیئ تاں مرساں
Verse 428پھر میں کیہا دیوتیاں دی جان ہندی ہر جائی تیری جان پیاری کتھے دسّ مینوں گلّ کائی
Verse 429ایہہ گلّ سن کے دیوے مینوں دتی جھڑک غضب دی جان میری سنگ کی کم تیرا نیت کس طلب دی
Verse 430کس کارے پر جان میری دے پچھیں پتے نشانے کون تیرا جو مارگ مینوں سن توں نعر ہیوانے
Verse 431کون جوان میرے تھیں چنگا وچ جناں انساناں ناہیں دیو زوراور بھارا میرے جیڈ تواناں
Verse 432کس اگے فریاد کرینگی کون لڑے سنگ میرے کس کارن پھر جان میری دے پچھیں پتے پکیرے
Verse 433جاں دیوے ایہہ جھڑک غضب دی دتی بہت نروئیمیں بھی اگوں غصے بولی نالے ہنجھو روئی
Verse 434دیوے اگے سڑکے بولی کیوں توں جھڑکیں مینوں قید رننجانی ہک اانی ترس نہ آوے تینوں
Verse 435مائع پیو بھیناں بھائیاں نالوں پائیوئی برا وچھوڑا دیسوں کڈھ بدیس بدھوئی قہر نہ کیتو ای تھوڑا
Verse 436نہ کوئی سنگ سہیلی ایتھے نہ کوئی ماں پیو جائی ہک ہکلی قید تیری وچ میں نمانی آئی
Verse 437کس اگے میں دسن چلی کہڑا ایتھے بندہ کون میرا فریاداں جوگا جس تھیں لگوئی مندا
Verse 438اگے انت شمار نہ غم دا سار-چنے نت چباں میں سر گھٹّ مصیبت دسے ہور چڑھاویں دباں
Verse 439درداں دی گلّ سن کے دیوے رحم پیا ات پاسے سر میرے نوں جھولی رکھ کے لگا کرن دلاسے
Verse 440کہن لگا دسّ دیواں تینوں تیرے تھیں کی چوری جتھے جان میری اس جائے پہنچ نہ کسے ہوری
Verse 441آدم ذات کسے دا اوتھے پیش نہ جاندا حیلہ نہ تیرا نہ ہور بندے دا تردا وسّ وسیلہ
Verse 442جان میری سندوکے اندر شیشے دا اوہ بنیا پھر صندوق سندوکے اندر جندریاں سنگ گھنیاں
Verse 443اوہ صندوق ندی دے تھلے ایہہ ندی جو وگدی شاہ-مہرے سلیمانی ہوون واہ اوتھے تد لگدی
Verse 444دو شاہ-مہرے صورتَ والے پاس ہوون جس بندے ہمت کرکے آن کھلوئی ایس ندی دے دندے
Verse 445اوہ شاہ-مہرے باندے کرکے دسے ایس ندی نوں ندی صندوق لیاوے باہر سائت گھڑی ادھی نوں
Verse 446کھل ونجن صندوق شتابی جاں شاہ-مہرے دسے اوہناں وچ کبوتر چٹا اڈّ کتے ولّ نسے
Verse 447اس کبوتر اندر رہندی میری جان پیاری مر جاواں میں اسے ویلے جاں اس نوں کوئی ماری
Verse 448ملکہ خاتوں خبر سنائی شہزادے نوں ساری صیف-ملوک ہوئیاں دل خوشیاں بہت آئی ہشیاری
Verse 449لگی آس ربے دے در تے ہویا فضل اساں تے حکم خدا دے دیو مریگا آیا کم وساں تے
Verse 450اوہ شاہ-مہرے صورتَ والے پاس شہزادے آہے کر تعویز گلے وچ پائے آہے گلوں نہ لاہے
Verse 451شکل بدیع-جمال پری دی آہی جان شہزادے پل پل وچ نہ وسدا اس تھیں دن دن شوق زیادے
Verse 452جانی نال رکھے لا سینے شاہ-مہرے سلیمانی قوت کوت زیارت اس دی اوہو سی زندگانی
Verse 453صیف-ملوک ہویا رنگ تازہ کھل گئی پیشانی زہر اوہدا ہتھ میرے اندر مرسی دشمن جانی
Verse 454ملکہ خاتوں نوں فرماندا ہن غم کرو نہ کوئی پاس میرے شاہ-مہرے دونویں گلّ جنہاں دی ہوئی
Verse 455جو ربّ کرسی سوئیؤ ہوسی ہور نہیں کجھ ہونا کیتا کرم کریم تیرے تے مکا پٹنا رونا
Verse 456ملکہ خاتوں ایہہ گلّ سن کے بہت ہوئی خوش وقتیسجدے پے کے شکر گزارے دور کرے ربّ سختی
Verse 457'الحمد ولمنت للا ' دھنّ اساڈے سائیاں میں تسی تے رحمت باراں کھریوں تدھ وسائیاں
Verse 458رات ہنیری ندی ڈونگھیری گھمن گھیر غماں دے رڑھدی جاندی غوطے کھاندی وچ شمار دماں دے
Verse 459غیبوں کشتی سنے ملاحاں آن ملائیؤ مینوں ہر آزز مسکین بندے دا ہے خصمانہ تینوں
Verse 460اوکھی گھاٹی مشکل اندر تدھ بن کوئی نہ والی آپ مسببّ نال سبباں غموں کریں خوش حالی
Verse 461'عنا للئبد ارہما' ربا سچ تیرا فرمانا ماں پیو بھیناں بھائیاں ایتھوں آہا کد چھڈانا
Verse 462میں آزز پر کرم کمائیؤ کیتو ای رحم رہیماتونہیں ساتھی بے قصاں دا لیناں ایں سار یتیماں
Verse 463توں ڈھٹھیاں نوں دیویں پٹی پھٹں بنھے پٹی بندی واناں کریں خلاصی ککھّ نہ لینیں چٹی
Verse 464بھاری مرض غریب بندے نوں دارو کجھ نہ سردا توں اس ویلے دکھ ونجائیں سکھ مریضاں کردا
Verse 465جے کوئی صبر کرے در تیرے جو دیویں سر جھلے اوڑک اس تے کرم کماویں ہو جاون سبھ بھلے
Verse 466لکھ کروڑاں نئمت بخشیں باجھوں مل مزوری رات ہنیری اندر دیویں بال شمع کافوری
Verse 467لکھ گناہ تیرے در پچدے ایسا لطفَ غفوریاگے تیرے ہر کوئی آزز کون کرے مغروری
Verse 468منگے باجھوں دیئں مراداں بے انداز شماراں جو احسان میرے پر کیتوئی دم دم شکر گزاراں
Verse 469کتھے ایہہ شاہ-مہرے آہے کتھے سی شاہزادہ کتھوں ٹریا کتھے پہتا تیرا فضل زیادہ
Verse 470ماں پیو سجن بھیناں بھائی ذات میری کلّ ساری ڈھونڈن لگدے نہ ہتھ لگدی رہندی قید بیچاری
Verse 471آپے فضل کیتا تدھ سائیاں قید اندر چاوتیجس ویلے توں مہریں آئؤں اس ویلے پرچتی
Verse 472بہت زہیری تے دلگیری میں سر ورتی آہی مہر کیتی تدھ ایہہ شاہ-مہرے آن دتے وچ پھاہی
Verse 473صیف-ملوکے اوہ شاہ-مہرے کھولھ تاویزوں کڈھے ملکہ سنے ندی تے آیا اوہ ٹکانے چھڈے
Verse 474کیتا وضو دوگانا پڑھیا کردا پھیر دوائیں مشکل حلّ کریں ربّ سائیاں ہوون ردّ بلائیں
Verse 475نہ کوئی زور دلیری میری نہ قدرت شاہ-مہرےسبھ قدرت دا سائیں تونہیں حکم تیرا ہے مہرے
Verse 476حکم تیرے بن ککھّ نہ ہلدا جو چاہیں سو ہوندا جس نوں آپ دلیری بخشیں اوہ میدان کھلوندا
Verse 477تیرے مان طران دلیری ہور نہیں کوئی ڈھیری ماریں دشمن دیو اساڈا سام پیا میں تیری
Verse 478فاتحہ خیر درود دوائیں آمین آکھ مکائیاں مہرے کھولھ ندی نوں دسے دریاوے موجاں آئیاں
Verse 479کانگ چڑھی ہک وانگ توفانے شوکو-شوکو قہر دی گھڑی پچھوں صندوق لیاندا باہر موج لہر دی
Verse 480پانی دھکّ کنارے آندا دندے آن کھلویا شاہزادہ کر یاد ربے نوں پکڑن اتے ہویا
Verse 481پڑھ بسملا کلمہ جلدی شہزادے ہتھ پایا یا قادر یا غالب کہہ کے سندوکے نوں چایا
Verse 482اس بنگلے وچ جا ٹکایا جس وچوں سن آئے ہر موری دروازے سارے محکم بند کرائے
Verse 483اعظم-اسم مبارک پڑھ کے چا صندوق اگھاڑے وچ کبوتر چٹا ڈٹھا راہ نسن دے تاڑے
Verse 484صیف-ملوکے بازاں والی کرکے جھٹّ شتابی پنجے مار کبوتر پھڑیا جیوں کیڑا مرغابی
Verse 485بنگلے وچوں باہر وگایا وڈھّ دھڑوں سر اسدا جاں سر وکھ ہویا تاں دھڑ تھیں پھیر نہیں کجھ کھسدا
Verse 486جھکھڑ مینہہ ہلونا آیا گرد غبار ہنیری امبر دھرتی کجھ نہ دسے دھندوکار چوپھیری
Verse 487اسماناں تھیں لہو وٹھا زمیں ہوئی آ رتی متّ ڈر جاوے ملکہ خاتوں اندر اہلے گھتی
Verse 488دھندوکار ہویا کجھ مٹھا دیو ہواؤں ڈھٹھا وڈا بلند اوازا ہویا ہور دینہدا سی گھٹا
Verse 489اپرلا دھڑ سارا اس دا کافوری رنگ چٹا لکوں ہیٹھ سیاح تمامی کیا تلیاں کیا گٹہ
Verse 490نکّ وچ ساس کمبے تے آکھے واہ دلیر جوانا تیرے جیسا دنیاں اتے ہے اج کون توانا
Verse 491میرے جیہا دلیر بہادر دیوتیاں پر بھارا تدھ انسانے مار گوایا ہیں کوئی لوک نیارا
Verse 492اول ایسی جائی آون ناہیں کم انساناں توں کوئی مرد کرامت والا اڈدا پھریں جہاناں
Verse 493میرا تے کوئی زور نہ چلدا مار گوائیوئی مینوں باپ میرے تھیں کت ولّ نسسیں جان نہ دیسی تینوں
Verse 494کر گلاں دم دیون لگا ایسا نعرہ مارے مچھّ موئے دریائے وچوں لگے ترن کنارے
Verse 495کنڈی ہیٹھ ہوئیاں ڈھڈّ اتے تردے مچھّ موئے سن دیوَ مویا شہزادے ہوریں دوئے خوش ہوئے سن
Verse 496صیف-ملوک شاہزادہ پڑھدا ایہو حرف زبانوں ہور بھی بہرے وچ سناواں بینت بنا تسانوں
Verse 497توکلت اﷲ ربّ اولسما وا سلمنا بِ اسباب ال کزائ
Verse 498(ہے اسماناں دے اچے ربا ! تیرے تے بھروسہ ہے ۔ توں اپنے حکم نال ساڈی سلامتی دے سادھن کردا ہیں )
Verse 499روح شاہزادہ دو شاہ-مہرے صدق محبت بھائی حرص ہوا دنی دا بنگلا تن کوٹے دی جائی
Verse 500آز حرص دو شیر کلاں دے کفل دراں بدبختیملکہ خاتوں ایہہ دل ستا شہوت جادو تختی
Verse 501نفس اساڈا دیوَ مریلا غفلت ندی ڈونگھیریجہل صندوق ہوئے دو پکے کنجی اسم چنگیری
Verse 502پنکھی پنجریاں وچ حساں پنج باطن پنج ظاہر باغ-ارم ولّ تانگھاں کردے نکلن ہوئے نہ باہر
Verse 503بابل مرشد جس شاہ-مہرے تحفہ چیز پچائی اس دے دتے لے شاہ-مہرے ہمت کریں کمائی
Verse 504ملکہ خاتوں ستی جاگے خبر دیئ دلبر دی چلے نال جمال دسالے سمجھو رمز فقر دی
Verse 505پور کر آن شراب پیالہ ساقی رنگ رنگیلا سہل ہووے پھر رنج مصیبت جاں سنگ ٹرے وسیلہ
Verse 506پی نشہ جیؤ مستی آوے جان قضیے سارے کنگالوں پھر شاہ کہاواں وچھڑے ملن پیارے
Point at or tap a word to see its meaning. With a keyboard, Tab reaches the words and the arrow keys move between them.