Verse 1ہے فجرے دی واؤ پیاری توں نت سفر تیاری ہر ہر شہر ولایت جاویں پھریں لوکائی ساری
Verse 2باغ بہار ہزاراں ویکھیں جوہاں جنگل بیلے کئیں کوہ قاف سمندر ٹاپو تکیں سنجھ سویلے
Verse 3ہر سوہنے دی زلفوں ہلے باس آئی ہر پھل دی تاہیں وقت فجر دے تدھ تھیں بند طبیعت کھلدی
Verse 4بہت کمال سخاوت تیری ورتے ہر ہر جائے بلبل بھور ہزاراں تائیں دس پھلاں دی پائے
Verse 5میں بھی کراں سوال ہمیشہ سخی سوال منیندے ویکھ کنگال وبال آلودہ جو سردا سو دیندے
Verse 6شہر ولایت یار میرے دی اج کلّ پھیرا پاویں نام اﷲ دے زلف اوہدی تھیں میں ولّ بو لیاویں
Verse 7صیف-ملوک اس بیبی کولوں جاں رخصت ہو آیا واہو داہی کیتی کیتی نت تردا دن دن شوق سوایا
Verse 8رستے اندر ناریں فوجاں ہر جا ملے سواری شیشہ اگوں دسے اوہناں پرط وننجن کر داری
Verse 9ستّ دہاڑے تردا رہا جا پہتا ہک جائی اچی ڈھیری اتے ڈٹھی قبر بلند بنائی
Verse 10لئل جواہر قبرے اتے کجھ لگے کجھ ٹنگے کول قبر دے حجرہ بنیا کسب ہوئے سبھ چنگے
Verse 11اچا ہک نشان کھلوتا سونے موتی جڑیا گولی نے شہزادے تائیں اس جائی تکّ کھڑیا
Verse 12اوتھے جا پھر ہوئی سلامی کہندی ہے شاہزادہ اتھے توڑی حد اساڈی ناہیں حکم زیادہ
Verse 13ایہہ تربت حد ساڈی اندر اگے اس تھیں ناہیں ایتھوں ہن کر رخصت مینوں جاواں پچھلی راہیں
Verse 14صیف-ملوک خچر توں لتھا واگ دتی ہتھ گولی نالے شیشہ دے کے کہندا نال اوہناں دی بولی
Verse 15دیئیں دعا سلام گھنیرا بیبی تائیں میرا تدھ میں نال مروت کیتی بھلا کرے ربّ تیرا
Verse 16گولی تائیں رخصت کرکے شاہزادہ اٹھ ٹریا اوہ خچر لے ٹری پچھاہاں جاں شاہ اہلے ہویا
Verse 17شہزادے کر لیا لنگوٹا لکّ بدھا واہ کس کے خوب ہتھیار پوشاک سمبھالی وگ پیا پھر رس کے
Verse 18رستے اندر ہرناں تائینممار شکار کریندا پتھر وچوں اگّ کڈھیندا خوب کباب بنیندا
Verse 19کھاندا پیندا مول نہ اڑدا اٹھدا بہندا جاندا سطر روز ہوئے پندھ کپدے پنڈ نگر نہیں پاندا
Verse 20ہک دن اک اجاڑ وڈیری آئی بہت مریلی نہ شکار نہ پانی اوتھے آپ خداوند بیلی
Verse 21ماروتھل سسی دے وانگر ریت ہوئی تپ رتی رتی گھٹّ نہ کربلاؤں وانگ قیامت تتی
Verse 22تتی واء جھلے وچ ایسی جیوں ہواڑھ نرک دی اڈدا پنکھی اتوں جاوے اگّ اوہنوں بھی لگدی
Verse 23نہ کوئی ٹھنڈی چھاں پچھاواں ساڑے دھپّ قہر دی باجھوں جل دے جلدی جلدی جلدی رتّ جگر دی
Verse 24جیا-جون اس جوہ جلی وچ جل بل جان جلاوے وسطی واس نہ پاس کوہاں تے ویکھ ہراس ستاوے
Verse 25گرمی تلخی سبھ زمیں دی اوتھے ہوئی اکٹھی جو پجدا سو بھجدا رہا جیوں جوں اندر بھٹھی
Verse 26صیف-ملوک اس جوہے آیا سڑیا درد غماں دا بھکھ پیاسے توڑے پاسے کیتا تھکا ماندا
Verse 27آب سوا بے تاب ہویا سی باب شہدے دا مندا جل بن جالن مشکل کیڑا انّ پانی دا بندہ
Verse 28بہت ہویا لاچار شاہزادہ طاقت زور نہ رہا تنگی تلخی ایسی جیسے جان-کندن دن ایہا
Verse 29کرے ارادہ ایہہ شاہزادہ ماراں پیٹ کٹاری اس تلخی دے سخت عذابوں چھٹے جند بیچاری
Verse 30عقل شہزادے نوں پھر ورجے متّ تیری کیوں ماری ساس اڈن تکّ آس نہ توڑن خاص جنہاں دی یاری
Verse 31نفس کہے میں کاہلا ہویا کچرک توڑی جرساں لکھ مصیبت جھاگ نہ ملیا اج ملے بن مرساں
Verse 32عقل کہے کیوں کملا ہوئیوں عشقے لجّ نہ لائیں اتنی سختی اگے جھلی آ کوئی دن ہور لنگھائیں
Verse 33نفس کہے ہن کتھوں ملسی نہ کوئی دسّ سنیہا آس ہندی دس پوندی جس دی ایویں جرن کویہا
Verse 34عقل کہے ایہہ کم عاشق دا عشقوں بسّ نہ کرنی لاکے بازی بے اندازی اوڑک وار نہ ہرنی
Verse 35نفس کہے ایہہ ہارن کیہا میں مڑ مصر نہ چلیا راہ سجن دے اندر مرکے بہتر خاکوں رلیا
Verse 36عقل کہے کھا کاتی مرنا کم ہندا شیطانی بھار لگا تاں پنڈ اتاری نہیں عشقَ دی بانی
Verse 37نفس کہے فرہادے لایا آپ سرے نوں تیشا اوہ مویا مردود نہ ہویا میں بھی اوہ اندیشہ
Verse 38عقل کہے فرہادے سنیا شیریں گئی جہانوں اوس جہان گیا سی ڈھونڈن مویا نہیں دقّ جانوں
Verse 39نفس کہے کیوں مہینوالے ماری چھال جھناویںمارو کانگ ڈٹھی سی سوہنی کیوں پئی دریاویں
Verse 40عقل کہے توں سمجھیں ناہیں اوہ مرنا کت پاسے دوئیے ہک دوئیے ولّ ٹھلھے گل ملن دی آسے
Verse 41جے ایہہ مرنا زائز ہندا تاں مجنوں کیوں روندا تریہ ورھے کیوں سڑدا رہندا مر سوکھا ہو سوندا
Verse 42جس دن ہیر ویاہی کھیڑے رانجھا بھی مر جاندا کاہنوں کنّ پڑاندا ٹلے گلّ کیوں کفنی پاندا
Verse 43ویکھ زلیخا کتنی واری دکھاں پئی اکائی مہرا کھا نہ موئی تاہیں ہر عاشق دی مائی
Verse 44ہور ہزاراں عاشق ہوئے دکھیئے تے لاچارییار ملے بن دردوں اک کی پیٹ چھری کس ماری
Verse 45مرداں والا دائیا کر خاں رکھ پچھلی جو عادت وانگ سسی جے تسا موئیوں تاں بھی این شہادت
Verse 46نفس عقل دی تابء ہندا جو کہندا سو مندا لاگی پنڈ مقدم موچی ساڈے اتے بندا
Verse 47جے کر شرع کراں اس گلّ دی دور سخن ٹر جاندا کرکے صبر محمد بخشا قصہ چل سناندا
Verse 48نفس عقل دا جھگڑا ترٹا عشقے رٹ مکائی صیف-ملوکے منصف بن کے فعال اتے گل پائی
Verse 49کہندا ربا جے توں مینوں دلبر نال ملاسیںتاں اس وقت کسے دے ہتھوں پانی سرد پلاسیں
Verse 50جے اک گھڑی نہ پانی لدھا ظالم لو قہر دی ساڑ ہلاک کریگی مینوں چاہ رہسی دلبر دی
Verse 51ایہو فعال ربے پر سٹّ کے شاہزادہ کڑمایا جنڈ گرنڈا رکھ سرہانے پاسہ زمیں تے لایا
Verse 52اکھیں ستیاں تے دل جاگے جاگے طالع ستے اچنچیت ہک مرد ازغیبوں آن کھلا سر اتے
Verse 53انگ انسانی رنگ نورانی آن نسنگ کھلوتابھاری سی دستار سرے تے سبز جویں رنگ طوطا
Verse 54صورتَ سیرت وانگ خضر دے چہرہ سورج چمکے والاں تھیں خشبوئی ہلے آن چوطرفی رمکے
Verse 55حسن جمال کمال اوہدے دی اوڑک حد نہ آہی دم دم اندر پاک زبانوں کردا ذکر الٰہی
Verse 56فیروزا رنگ آسا ہتھ وچ سبھ سفید پشاکیمظہر نور الٰہی ددا جسا جامہ پاکی
Verse 57خسخس جتنی میل نہ کدھرے نہ پیریں نہ جوڑے سادے وال سرے تے لشکن جیوں سی کلغی توڑے
Verse 58ہتھ دوجے اس چھنا پھڑیا ٹھنڈھا پانی بھریا حوض کوسر دے چشمے وانگر دندیاں اتوں تریا
Verse 59خوش آواز رسیلا کرکے مٹھی نال زبانے شہزادے نوں کیہا اس نے اٹھ عاشق مردانے
Verse 60اس جوہے وچ تیرے کارن مولٰی مینوں گھلیا ہور نہیں کوئی مطلب میرا نہیں کتے ولّ چلیا
Verse 61تیرے اتے رحمت کیتی آپ خداوند سائیں پانی دے اچیچا گھلیا تدھ ولّ میرے تائیں
Verse 62اٹھ شتابی نال خوشی دے پی ایہہ شربت مٹھا تھوڑے دن ہن موہلت رہندی کھلسی تیرا چٹھا
Verse 63اج کل وچ خداوند تینوں ایسی تھاں پچاسی جتھوں محرم اس پری دا ملسی تے دسّ پاسی
Verse 64اوہ بھی نال تیرے ٹر جاسی توڑ پری تکّ سنگی دل تھیں چنتا چا شہزادے نہ کر خفگی تنگی
Verse 65فکر فراقَ قضیے سختی دکھاں چھیکڑ آئی وقت خوشی دا نیڑے آیا ہمت کر توں بھائی
Verse 66اگے تھوڑی بپتا رہندی گیا قضیہ لما چل شہزادے ولّ سجن دے بیٹھ نہ ہو نکما
Verse 67صیف-ملوک اوہدی گلّ سن کی پل وچ دونا ہویا گلّ نہ سی کوئی آب ہیاتی مویا اٹھ کھلویا
Verse 68شہر-سباؤں پاس سلیماں پہتا ہد ہد مٹھا یا یوسف پیراہن گھلیا یئکوبے نے ڈٹھا
Verse 69یا سسیّ نوں ملے ہتھوئی بھلے کیچ نگر دے یا وکیل زلیخا ڈٹھے خاص عزیز مصر دے
Verse 70یا ہیرے دا باہمن آیا رانجھے دے وچ خانے یا مجنوں ولّ زید لیایا لیلیٰ دے پروانے
Verse 71یا اوہ مینہہ بہاری ملیا باغ خزاں دے مارے یا اوہ باتی بجھدی جاندی پہتا تیل دبارے
Verse 72یا بلبل نوں واء فجر دی رکئے کھڑے گلاں دے یا اوہ راہ بر محرم ملیا اوجھڑ بھلے جاندے
Verse 73یا اوہ رات ہنیری اندر چڑھیا چن اسمانییا اوہ ماہی نوں لے آوے کدھرے نظر نورانی
Verse 74یا تعویز فرشتے آندا اپر چکھا خلیلےیا کھوہے وچ یوسف کارن کھڑیا وحی وکیلے
Verse 75صیف-ملوکے اچن چیتی اکھیں اگھڑ گئیاں سر دھڑ کنّ بناکے سندا کھل گئیاں کھڑکیاں
Verse 76ابڑھ واہیا اٹھ کھلوتا بھلی طرحاں تمامی اس بزرگ ولّ نال ادب دے نیوں کے ہویا سلامی
Verse 77باتازیم سلام ہزاراں کرکے ادب زیادہ یا حضرت کی نام تساڈا کردا عرض شاہزادہ
Verse 78اس بزرگ نے کیہا اگوں میں ہاں ملک سرشتا میرا نام خداوند دھریا جبرائیل فرشتہ
Verse 79لکھ لکھ ہووے مبارک تینوں صیف-ملوک جوانا تھوڑی سختی رہندی باقی پھریا نیک زمانہ
Verse 80مطلب تیرا حاصل ہوسی جاسن غم ہزاراں نال بدیع-جمال پری دے کرسیں چین بہاراں
Verse 81عقد نکاح کرینگا اس نوں راج ہووےگا تیرا شاہ-پریاں دے گھر وچ خشیئیں کاج ہووےگا تیرا
Verse 82چاہ مراد تیری سبھ ملسی دولت تخت شاہی دا حیلہ کر جے ملے وسیلہ وچ وکیل چاہیدا
Verse 83جے سو حیلے باجھ وسیلے کریئے نال دلیلےبھار بیڑے دا پار نہ جاندا باجھ ملاہ رنگیلے
Verse 84نال ملاہ صلاحَ ملائیں ٹھلھ چلائیں بیڑا پیر بناں تدبیر نہ کوئی جھوٹھا ایہو جھیڑا
Verse 85لوڑ موکل کریں توکل منی اس دا کہنا دسّ پاوے تے یار ملاوے پوے نہ پھر غم سہنا
Verse 86کنڈے سخت گلاباں والے دوروں ویکھ نہ ڈریئےچوہباں جھلیئے رتّ چوآئیے جھول پھلیں تد بھریئے
Verse 87باشک ناگاں دے سر گاہیں آون ہتھ خزانے رتّ ڈولھیں پھٹّ کھاویں شاہا سوکھے نہیں یرانے
Verse 88صیف-ملوک شہزادے تائیں حکمے نال ربانے اعظم اسم فرشتے دسیا پڑھیا شاہ سیانے
Verse 89آسے نال فرشتے سچے لیک زمیں تے پائی کہیوسُ اس رخ تے جائیں لوڑ کریں ہر جائی
Verse 90آپ فرشتہ غائب ہویا چھوڑ شہزادے تائیں صیف-ملوک خوشی کر ٹریا ہوئیاں دور بلائیں
Verse 91خاتر جمع تسلی ہوئی خطرہ رہا نہ کوئی چامل چایا تے اٹھِ دھایا شیر جنگل جیوں ہوئی
Verse 92جنگل بار اجاڑ وڈیری ہور اگوں پھر آئی انت حساب شماروں باہر چڑیائی لمیائی
Verse 93جے سبھ خلقت روئے زمیں دی جا اوہدے وچ چھپے جیوں آٹے وچ لون نہ دسدا تویں ساری کھپے
Verse 94بار مریلی جان اکیلی یار نہیں کوئی ساتھی گل ڈراون تے کول آون دیو وڈے جیوں ہاتھی
Verse 95رات ہنیری خوف چوپھیرے بولن دیو بلائیں عاشق باجھ نہ قدر کسے دا بچے اجیہی جائیں
Verse 96انّ نہ پانی واس مسانی رستے نہیں نشانی جنڈ گرنڈے کنڈے پور پور ظالم سلے کانی
Verse 97نازک پیر پھلاں تھیں آہے ریشم پھلّ لپیٹے نت لگا ہن جنگل گاہنے پھڑے برے السیٹے
Point at or tap a word to see its meaning. With a keyboard, Tab reaches the words and the arrow keys move between them.